Wusud po třećim sudniskim jednanju w padźe „Monika“ dale njewěsty

Berlin (SN/MiP). Něhdźe dwaceći ludźi steji před durjemi rumnosće jednanja na krajnym sudnistwje w Berlinje. Čakaja na zahajenje třećeho sudniskeho jednanja w prawniskim rozestajenju, wo kotrymž su medije jako pad „Monika“ wospjet rozprawjeli (tež SN). Mjez čakacymi napadnje starša žona, kotraž sej mjezwočo ze židźanym rubiškom pokrywa a so wočiwidnje zjawnosći pokazać nochce: Monika. Tutón napohlad je runjewon symboliski. Wšako wona – mjeztym hižo druhe lěto – přećiwo wužiwanju grafiki skorži, z kotrejž bě ju Hanka Krawcec zwobrazniła. Při tym złožuje so na „prawo na swójskim wobrazu“, kotrež je dźěl powšitkowneho prawa wosobiny w zakładnym zakonju.

Wuměłča bě 1960 tehdy 16lětnu z wołojnikom portretowała. Na zakładźe rysowanki bě w lěće 1974 wonu grafiku w modernym minimalistiskim duktusu stworiła. Wobskorženy, mějićel modoweho labela LABA Gerhard Zschau ze Zhorjelca, chce linolowu grafiku Hanki Krawcec z titulom „Monika“ na t-shirty ćišćeć.