Europski zapósłanc Oliver Schenk w Budyšinje běrow wotewrěł

Budyšin (SN/mb). Wysoka hasa čo. 16 w Budyskim starym měsće je wot zašłeho pjatka móst do Brüssela: Oliver Schenk (CDU, 56), wot lońšeho nowy zapósłanc europskeho parlamenta, je w sprjewinym měsće, w běrowje něhdyšeje zapósłanče zwjazkoweho sejma Marje Michałkoweje, stejnišćo wotewrěł. Do swjatočneho zahajenja swojeje noweje wotnožki je Serbske Nowiny (SN) na kofej a rozmołwu přeprosył. W Chrósćicach bě Schenk před lětom jako šef statneje kenclije zdźělenku sakskeho knježerstwa wo spěchowanju lětušeho kongresa Europasion we wysokosći 77 300 eurow přepodał. „Sym pytnył, zo je tam swět w porjadku“, so politikar na zarjadowanje z Towarstwom Cyrila a Metoda a fararjom Měrćinom Deleńkom na Chróšćan farje dopomina.