Marko Wjeńka

Ze superlatiwami dyrbiš zlutniwje wobchadźeć, dokelž so spěšnje přetrjebaja. Tole je žurnalist Hanns Joachim Friedrichs 1989 rjekł, po tym zo běchu jemu powěsć na blido połožili, zo je Berlinska murja wotewrjena. Tola na kóncu njeměješe tež wón žadyn druhi wuraz hač „historiski“, hladajo na tutón podawk.

Mi nochce hladajo na hoberski wukon Chróšćanow w lěće 2025 tež ničo druheho do mysli přińć hač „historiski“. Hdy smy tajke něšto hižo raz měli? Tři kulturne wjerški, kotrež su sej wjele dźěła a prócy a wosebje wutrajnosć žadali. Jubilejne swjatočnosće k 800. róčnicy naspomnjeja wsy w juniju běchu přewšo poradźene a dostojne. Swjedźenski ćah z wjace hač 40 wobrazami a sobuskutkowacymi wšěch wjesnych dźělow bě impozantny.

Folklorny festiwal jenož dny po tym bě kaž přeco wulke wužadanje. A nětko tež hišće pasion. Tón je wšitkich sobuskutkowacych wosebje napinał: Přihoty su hižo před lětom zahajili. Na kóncu steješe 180 wosobow na jewišću. Jich hrajerski wukon je wšitkich zahorił.