376 sportowcow na wubědźowanju blackbird-run
Štóž bě 7. septembra připadnje něhdźe blisko Hózka, Koćiny abo Rachlowa po puću, je tójšto widźał: Sta sportowčow a sportowcow, kotřiž so přez błóto a wodu bědźachu. Přiležnosć bě 7. blackbird-run-wubědźowanje, na kotrymž dyrbješe 376 wobdźělenych swoje zamóžnosće na dwanaće kilometrach z 15 zadźěwkami dopokazać. Wosrjedź podawka běchu sobustawojo serbskeje rejowanskeje skupiny Smjerdźaceje, kotřiž so wospjet na wubědźowanju wobdźělachu, a ja.
Po zhromadnym woćoplenju so wubědźowanje dypkownje w 16 hodź. započa. Hižo po někotrych metrach bě jasnje, zo njejedna so wo wuchodźowanje. Prěni wotrězk wjedźeše do Čorneho Halštrowa. Něhdźe dźesać mjeńšinow stupachmy we wodźe. Woda sahaše hač k bjedromaj. A runje, hdyž sej myslachmy, zo mamy najhórše za sobu, wočakowaše nas překwapjenka. Krótko do toho, zo z wody stupichmy, čakaše na wšitkich wobdźělnikow hłuboke městno, tak zo běchu wšitcy mokri hač do šije.
