Wulka radosć na 800lětnym jubileju a na wjacorych premjerach
Před dwěmaj tydźenjomaj su w Pěskecach jubilej 800. róčnicy prěnjeho naspomnjenja wsy woswjećili. Milenka Rječcyna je so ze Sabinu Žurowej, kotraž słuša do kruha přihotowarjow swjedźenja, rozmołwjała.
Kotry woznam ma za Was lětuši swjedźeń k jubilejej prěnjeho naspomnjenja wsy Pěskecy před 800 lětami?
S. Žurowa: Tónle wjesny swjedźeń bě jubileja dla cyle wosebity. A tež městnosć swjedźenišća wosrjedź wsy bě hinaša. Smy dźakowni za zmištrowanje wužadanjow kaž tež za premjerne překwapjenki. Tak smy z wjesnjanami a hosćimi na wurjadne wašnje swjećić móhli. Naši wobydlerjo su dopokazali, zo móžemy so jedyn na druheho spušćeć. Nichtó njeda so dołho prosyć, hdyž dźěło do rukow hlada. Myslu, zo tale dobra zhromadnosć našu wjesku wučinja a to přez wšitke generacije. Naš recept je, zo za jedyn postronk ćehnjemy. Nam je so tójšto radźiło, dokelž běchu wšitcy wobdźěleni a to w přihotach na swjedźeń a tež při swjedźenju samym.
Je so woprawdźe wšitko po přećach Pěskečanow radźiło?
