W kónčinje olympiskich hrow bydlacu mjeńšinu maja lědma zańć

Cortina d’Ampezzo (SN/MiR). Prezidentka ladinskeje organizacije Union de i Ladis de Anpezo, Elsa Zardini, kritizuje ­organizaciski komitej aktualnych olympiskich hrow. W rozmołwje ze žurnalistom dźenika Primorski dnevnik (dźenik słowjenskeje mjeńšiny w Italskej) Danjelom Radetičom wona rjekny, zo je ju komitej zludał, dokelž njeje Ladinjanow scyła na wědomje brał. „Ani jónu njejsu naspomnili, zo smy w Dolomitach wot pradawna sydlacy wobydlerjo, zo mamy swoju kulturu, rěč a tradicije.“