Budyšin (SN). Mnozy młodźi ludźo žedźa so runja předchadźacym generacijam za swójskim domom abo bydlenjom. Wědomostnicy njewotwisneho slědźenskeho Instituta Pestela su nětk za wokrjes Budyšin zwěsćili, zo 48 procentow domjacnosćow podruž płaćić njetrjeba, wšo dohromady 71 000. Z nich je 93 procentow w swójskim domje žiwych, sydom procentow w swójskim bydlenju. Z tym je kwota wjetša hač w přerězku po cyłej Němskej, 43,5 procentow. Tež w Serbach a Łužicy widźiš, zo maja w generaciji 25- do 40-lětnych runje ći, kotřiž su so rozsudźili, swójbu w domiznje załožić, perspektiwu „swójskich štyrjoch sćěnow“ před wočomaj. Tuta starobna skupina wučinja w Budyskim wokrjesu tuchwilu 40 000 ludźi. Hladajo na dołhodobnje spochi njewěsćiše wuhlady, zo změja ludźo dosć wulku rentu, je tajke wobsydstwo, kotrež w starobje žiwjenje bjez po­druže zmóžnja, kaž „renta w kamjenju“, piše zwjazkowy zwjazk za fachowe wi­kowanje twaršćiznow (BDB) w swojej zdźělence.