Dwajo mjez 1 001 – delegataj Budyskeho wokrjesa zhladujetaj na zjězd CDU

Budyšin (SN/mb). Birgit Elsner je jednaćelka Budyskeho wokrjesneho zwjazka CDU a bě jedna z dweju zastupjerjow regionalneho cyłka mjez 1 001 delegatami na zwjazkowym stronskim zjězdźe w Stuttgarće pjatk a sobotu. Druhi delegat bě wokrjesny předsyda a IT-předewzaćel Steffen Roschek. Wón je na Instagramje rjane foto wozjewił, na kotrymž widźiš Elsner z nalěpkom „Sorbisch? Na klar“, jako jej zwjazkowy kancler a předsyda CDU Friedrich Merz ruku podawa. Serbskim Nowinam (SN) Elsner wčera wobkrući, zo bě jej jako Radworčance tute znamjo za prezencu serbskeho ludu jara wažne.

Dźewjeć měsacow po spočatku koalicije CDU z SPD pod kanclerom Merzom, kotrehož bě CDU Budyskeho wokrjesa ­hižo 2021 podpěrała, jako wón we wubědźowanju wo zastojnstwo předsydy naposledk tola Arminej Laschetej podleža, dowěra ludnosće k njemu na hračkach steji: Zawčerawšim wozjewjene woprašowanje instituta INSA měri za CDU/CSU 25 procentow přihłosowanja a runje telko za AfD – najebać retomas aferow prawicarskeje opozicije.