Marija Wjeselina je sej w Ralbicach wellnessowu oazu stworiła, hdźež je přebywanje přewšo přijomne

Na dworje statoka Wjeselic swójby w Ralbicach je wočiwidne, zo wědźa sej wopytowarjo wšitkich generacijow w tamnišej wellnessowej oazy přijomny přebytk popřeć. Tón traje po přeću hodźinku, dwě abo tež wjacore - cyle po tym, kelko chwile sej hosćo bjeru abo kotry poskitk woni wužiwaja. Wosebje skupiny a poriki dadźa sej wopyt baziskeje kupjele z drohokamjenjemi, infračerwjeneje kabiny, lounge a wellnessowe masaže z kamjenjemi a meditaciju lubić. „Wone zwěsćeja, zo jim zhromadny čas wotpinanja tyje, maja za sebje cyle priwatnje chwile“, Marija Wjeselina zwuraznja. Jako so pola młodeje předewzaćelki na rozmołwu přizjewich, mi wona rjekny, zo ma překwapjenku přihotowanu. Kak pak ta wupada? Po prěnjej hodźince wěm wo wjele wjace hač w tym wokomiku, jako pola Wjeselic zaklinkam. Zastupju do domskeho, kiž mje z decentnej elegancu wita. Cuni klinkot – myslu, zo su to małe zwónčki – klinča w mojimaj wušomaj a mje přez cyły čas mojeho přebytka přewodźeja.