Dopomnjenki Jolanty Bombery-Rječcyneje na 24 lět zhromadneho dźěła z Markom Wjeńku w redakciji Serbskich Nowin

Luba Jolanta,

jako će lěta 2002 prěni raz w swojim běrowje w redakciji SN wuhladach, ani w najmjeńšim na to njemyslach, zo sy ty takrjec posoł ‚słužbneho poćaha‘, kiž ma nimale 25 lět dźeržeć a na kóncu tysac přinoškow wunjesć.

Nawróćiwši so z dowola wuhladach za pisanskim blidom – hdźež ­sedźa ­stajnje šulerjo, praktikanća a započatkarjo – chětro spłóšiwu młodu žonu. ­Wočiwidnje bě ći hektiske žiwjenje redakcije z tehdyšim šefredaktorom na čole poslednje čuwy rubiło. Twoje prěnje prašenje, tehdy hišće němsce, rěkaše: Wie heißt Irrenhaus auf Sorbisch? Zwjeselenaj zwěsćichmoj, zo njejstej serbska ­„błudnica“ a pólski dom wariatów wot so ani tak zdalenej.

Spěšnje pytnych, zo mam jako politiski redaktor z Tobu mi napřećo wěcywustojnu za politiku, kotruž móžu so w prašenjach pólskeje politiki stajnje prašeć. Poněčim wurosće z toho prawidłowne zhromadne dźěło a tydźenska kolumna.