Wot 15. meje pokazuja na hrodźe w Moritzburgu wustajeńcu „Dünnes Eis – Inuit zur Schau gestellt“.­ W jeje srjedźišću steji njewšědny event, kotryž wotmě so před wjace hač 200 lětami a přiwabi tysacy wopytowarjow do woneje gmejny. Na přeprošenje­ sakskeho krala pokazowaše tehdy George Niakungitok, rodźeny w dalokim Labradorje, na wodźe před hrodom swoje zamóžnosće w kajakowanju. Tele njewšědne předstajenje je na swojorazne­ wašnje tež ze serbskimi stawiznami zwjazane a pokazuje, kak globalnje splećene wone hižo spočatk 19. lětstotka běchu.

Misionar Jan Hoštenk a jeho žona Marja Madlena

Stawizna, kotraž wjedźe do dalokeho Labradora, na pruski­ kralowski dwór a do serbskich holanskich wsow wokoło Wochoz, započa so 1762 w serbskej wsy Žornosykach pod Čornobohom. Tam narodźi so 18. januara Jan Hoštenk, w pozdźišich žórłach mjenuje so přewažnje Johannes Hasting abo John Hastings. Jeho staršej přisłušeštaj bratrowskej jednoće, prawidłownje so pobožni pola nich doma ­zetkawachu.