Oberlichtenau (lmi/SN). Towarstwo Fabmobil přeprošuje młodostnych do barokneho hrodu w Oberlichtenauwje na digitalny camp. Tón wotměje so lětsa wot 9. hač do 12. julija w tamnišich dźěłarnjach akademije za digitalnu technologiju. W běhu dweju dnjow móžeja młodostni w starobje wot 15 do 18 lět w dźěłarničkach eksperimentować a so nimo toho w hrodowym parku wucychnować, hdźež maja hrajnišćo za wolejbul a blidotenisowu platu. Poskitki su pisane: Wobdźělnicy scannuja skulptury w parku a wuwija modele při kompjuteru, we workshopje sound & robotic twarja mašinu za tworjenje zwukow a w dalšej dźěłarničce módroćišć z digitalnymi srědkami na nowe wašnje interpretuja. Přizjewjenja přijimuja hač do 30. junija, předznajomnosće trěbne njejsu. „Tuž budźće spěšni!“, namołwja Serb Bosćij Pjaca, załožer designoweho a slědźenskeho studija The Constitute a nawoda projekta Fabmobil. Na dotalnych campach w Zhorjelcu, na kotrychž wobdźělichu so stajnje tež serbscy młodostni, běchu městna jara požadane. Wobdźělnicy přenocuja w stwach ze štyrjomi łožemi a budu derje zastarani.