Zetkanje šulerskich dźiwadłow: Wot antiki hač k palacej aktualiće

Budyšin (SN/bn). 11. zetkanje šulerskich dźiwadłow Sakskeje je so wot póndźele do wčerawšeho w Němsko-Serbskim ludowym dźiwadle wotměło. Jako festiwal koncipowane zeńdźenje je wuslědk projekta Kooperacije šulow a dźiwadłow w Sakskej KOST w nošerstwje Sakskich krajnych jewišćow Radebeul. Wone ma předewšěm dorostowym hrajerkam a hrajerjam być z forumom, hdźež móža swoje kmanosće zjawnje prezentować a so mjez sobu wuměnjeć. Zdobom słuži hrajnym nawodam kaž tež pedagogam jako „zetkawanišćo fachoweho dialoga“ kaž tež takrjec jako labor „za wuslědźowanje nowych metodow“, w swójskim wopisowanju zarjadowanja rěka. Kóždolětnje wuzwola jury na zakładźe powabjenjow pjeć do sydom skupinow, kiž so na zetkanju wobdźěli. Tute wotměwa so stajnje krótko do lěćnych prózdninow w měnjacych so městach.