Radwor (JM/SN). Pisane balonki na dworje serbskeho experiMINT-campusa w Radworju wabjachu wčera na knižnu premjeru BOOKii-knihi „Dožiwjej přirodu!“. Dešća dla su na zahrodźe planowane zarjadowanje do nutřkownych rumnosćow přepołožili. Něhdźe 45 hosći bě přeprošenju sćěhowało – dźěći a starši z Radworja a wokoliny kaž tež z Budyšina. Z wulkimi wočemi napjeće słuchachu, što měješe lektorka Ludoweho nakładnistwa Domowina Janina Mikławškowa wo nowej knize powědać. Z pomocu wuzwolenych stronow poda wona na wobrazowce dohlad do knihi a zawjedźe małych a wulkich hosći w přenjesenym zmysle do přirody. Hač na łuce, w lěsu, při abo we wodźe a samo w měsće – wšudźe nas přiroda wobdawa. Dźěći běchu jara aktiwne a wušikne a spěšnje wšě prašenja lektorki wotmołwichu.