Z domom so tež pomjatna tafla za serbskeho nowinarja a basnika zhubiła

Jězba po Pólskej wjedźeše mje njedawno tež do Namysłówskich stron. Kónčina je za Serbow zwjazana ze serbskim nowinarjom a basnikom Janom Skalu, kotryž bě tam kónc wójny 1945 zahinył a bu pozdźišo na wšelake wašnje česćeny.

Nowinar a narodowc

Jan Skala pochadźeše z Njebjelčic, hdźež bě so 1889 do dźěłaćerskeje swójby narodźił. Powołansce skutkowaše jako žurnalist a redaktor pola wšelakich nowin a časopisow w Běłej Wodźe, Budyšinje, Praze a Berlinje. Jako zamołwity redaktor časopisa narodnych mjeńšin bě angažowany kritikar němskeje mjeńšinoweje politiki. Nimo toho wustupowaše jako serbski basnik, spisowaćel a narodowc. Nacionalsocialisća zapowědźichu jemu do­wolnosć, žurnalistisce dale skutkować, a jeho na dlěši čas zajachu. Po tym dźěłaše we wšelakich priwatnych předewzaćach w Budyšinje a Berlinje. Hrožaceho bombardowanja němskeje stolicy dla wućekny sej 1943 ze swójbu do Delnjeje Šleskeje, hdźež namakachu hospodu pola­ přiwuznych mandźelskeje w Dziedzicach (tehdy Erbenfeld).