Hodźinu projekta dla nóžkować je za dźěći­ a młodostnych wěste wužadanje. We Wodowych Hendrichecach pak su tole nětko činili a tak nawuknyli, kak móže ze zeleniny přirodna a scyła nješkódna barba nastać.

Čerwjeny kał warić kóždy móže – z njeho barbu dźěłać pak jenož najmjenje ludźi. Dźěći a młodostni, kiž tuchwilu w prózdninskim lěhwje we Wodowych­ Hendrichecach přeby­waja, su pak tole minjenu srjedu na­wuknyli. Čerwjeny kał, morchej a łopjena tomaty běchu 59 serbskim prózdninarjam zakład za dohromady pjeć barbow. Claudia Pohl, sobudźěłaćerka towarstwa Lebens(T)räume w Nowych Jěžercach, je jim rozkładowała, kak so z kruteje zeleniny barba stanje. Za to dyrbjachu woni rostliny najprjedy do małych kruchow rozkrać a je z pěsću (Stößel) cyle drobnje roztołkać.

Zo bychu jušku wot kuskow dźělili, składźechu dźěći trjenčka do křidkow. Wužimajo měšeńcu zeleniny a juški nahromadźichu šwarnje wjele brěčki. Ta tomatowych łopjenow bě zelena kaž trawa, brěčka morchejow ćmowje oranžojta a kała wioletna.