Josephina a Sarah Bretšnajderec wozjewjatej swójske spěwy na streamingowych platformach

Dwójnikaj Josephina a Sarah Bretšnajderec stej za to znatej, zo hižo wot dźěćatstwa spěwatej. Ze swojej nowej hudźbnej skupinu „play/us“ zwažitej so nětko do swěta elektroniskich zwukow a wozjewjatej swójske spěwy. Hudźba leži pola Bretšnajderec po wšěm zdaću w swójbje. Jeju mać je spěwarka a skutkuje w dźiwadle, tež jeju wowka a jeju starša sotra skutkujetej na wuměłskim polu. „Někak bě hižo přeco jasne, zo stej wuměłstwo abo hudźba jara wažnej w naju žiwjenju“, powěda Josephina. Wot druheho lětnika spěwatej dźensa 20lětnej zhromadnje w chórje.