Na wopyće w Sydom gmejnach w sewjerowuchodnej Italskej – Cymbrojo su něhdy z južneje Němskeje připućowali

„Boolkhent in de hòoghe Vüüronghe dar Siben Komòine“, steji na tafličce blisko „Osteria all’Antico Termine“. Hosćenc leži mjez Trientom a Vicenzu, wosrjedź horow. Kaž italske mjeno hižo praji, steji restaurant při mjezy. Dźensa skónči so tam region Trentino – Južny Tirol a Veneto so započina. Hač do kónca Prěnjeje swětoweje wójny běše mjeza statna hranica mjez awstriskim Tirolom a kralestwom Italskej, a dobry lětstotk do toho storčištej tam Habsburgske mócnarstwo a Venedig na so.

Pozdatnje jazyk łamace słowa na tafli pochadźeja z němskeje narěče a witaja wopytowarjowdo kraja Cymbrow na dostojne wašnje a z historiskej patinu: „Witajće do wysokeho regentstwa Sydom gmejnow“.