Po Serbskim seminarje chce biskopstwo tež jeho naslědnika wotbyć

Drježdźany/Smochćicy (SN/LuNo) Nowostka, zo chce Drježdźansko-Mišnjanske biskopstwo Smochčanske kubłanišćo swjateho Bena hač do klětušeho kónca julija předać, dokelž ma z nim financne ćeže we wysokosći lětneho deficita něhdźe 700.000 eurow, je w Serbach wěste přesłapjenje zbudźiła. To z tym zwisuje, zo je Smochčanske kubłanišćo znaty zetkawanski dom wosrjedź serbskich kónčin. Historisce pak tež z tym, zo dźe při tym wo symbol katolskeho kubłanja, wšako bě w lěće 1921 znowa wutworjene Mišnjanske biskopstwo Serbski seminar w Praze jako pozdatnje hižo njetrěbny a předrohi dom Čěskosłowakskej předało, kotraž bu po Prěnjej swětowej wójnje załožena.