Budyšin (SN/bn). „Dótkanja“ rěka nowa, w Ludowym nakładnistwje Domowina wušła zběrka poezije Milana Hrabala, kotruž awtor wčera w połnje wobsadźenej Smolerjec kniharni premjernje předstaji. Antologija je prěnja serbska publikacija čěskeho basnika a wopřijima něhdźe połsta lyriskich přinoškow kaž tež krótkopowědančko „Hanka“. Wjetšinu twórbow běchu Měrana Cušcyna, Róža Domašcyna, Benedikt Dyrlich, Jurij Łušćanski, Timo Meškank, Alfred Měškank, Božena Pawlikec a Dorothea Šołćina zeserbšćili, šěsć basnjow je awtor sam w jemu přewšo bliskej „njemaćeršćinje“ spisał. Z nich recitowaše Hrabal mjez druhim twórbje „Basnik so rozžohnuje“ a „Łužica na předwječoru“, wěnowanej wusahowacymaj serbskimaj poetomaj Kitej Lorencej a Benej Budarjej. Přestajiwši dalši přikład „Runje nětko Mikławšk“ přeradźi wón publikumej, zo bě jemu „zetkanje rěčow na tamnišich narownych kamjenjach“ runje tak z inspiraciju kaž na přikład dožiwjenja we wobłuku Mjezynarodnych swjedźenjow serbskeje poezije.