Přestudować rozprawu Zhorjelskeje policajskeje direkcije a wotwažować, što hodźało so z njeje wozjewić a što nic, słuša hižo wjele lět k mojemu wšědnemu nowinarskemu dźěłu. Po začuću běchu wšitke delikty hižo zastupjene: ćeknjenja z wobchadnych njezbožow, zadobywanja do wobchodow, bijeńcy w bydlenjach, drogi a wjele, wjele dalšeho. Měnjach, zo mje hižo ničo šokować njemóžeše.

Mjeztym pak jewja so w rozprawach njeskutki, kotrež mje kóždy raz znowa rozhorjeja, mjenujcy wobšudnistwa najwšelakorišeho razu při telefonje. Mi so zda, zo dźeń a bóle přiběraja. Mjeztym zo běchu to spočatnje hišće cyle wulke wuwzaća, dyrbi policija wo tajkich padach nětko nimale tydźensce rozprawjeć. Hakle njedawno je žona w Běłej Wodźe wjace hač 20 000 eurow zhubiła, dokelž je cuzym při telefonje dowěriła a pječa lukratiwnu inwesticiju za sebje wužić chcyła. Pjenjezy su fuk.