Wojerecy (SN/bn). Pod hesłom „Krótko & słódko“ wotmě so předwčerawšim třeći festiwal SubSorb we Wojerowskej Kulturnej fabrice (KuFa). Hinak hač w minjenymaj lětomaj wuhotowachu jón tónraz jako dnjowe zarjadowanje. Hłownje wěnowachu so wuměnje mjez akterami. Tak wuwi so zazběhowa dźěłarnička projekta Drasta digitalnje na diskusiju, kotraž wujewi, zo moderna technologija tradicionalne rjemjesło njenaruna, ale wudospołnja. We wobłuku prezentacije „Identita a inscenacija“ mjenowachu zastupjerjo hibanja Nowe serbske wuměłstwo NSK wonkowne impulsy a kombinowanje ekstremow jako sobu najwažniše faktory kreatiwity. Swójske tworićelske kredo zjimachu z citatom słowjenskeje skupiny Laibach, po kotrymž pěstuja „humor, kotryž žorty nječini“. Iniciatorojo Serbskeje swětnišćoweje agentury SoSA podšmórnychu, zo chcedźa „integrujo indigene předstawy socialne rumy za wuměłstwowe rozestajenje z wědomosću wutworić“.