Podstupim (SN/bn). „Nacasne serbske wuměłstwo – Načasne serbske wuměłstwo“ rěka wustajeńca, kotraž wot wčerawšeho twórby dohromady dźesać wuměłčow a wuměłcow w Podstupimskim Wuměłstwowym domje pokazuje. Přehladka prezentuje mjez druhim mólby, wutřihanki, fotografije, tekstilowe wuměłstwo a instalacije čłonkow a čłonow hibanja NSK Lipsk (skrótšenka steji za Nowe serbske wuměłstwo) resp. Kolektiwa Wakuum. Wotewriwši wernisažu wuzběhny předsyda towarstwa Wuměłstwowy dom Podstupim Martin Gorholt, zo wotbłyšćuje wustajeńca, kak so serbske wuměłstwo najebać „wulki přiměrjenski ćišć wuwiwa. Wona sposrědkuje aktualne přistupy a wuhlady, kotru rólu Serbja přichodnje w Sakskej a Braniborskej hraja. Runje tohodla prezentujemy ju w krajnej stolicy.“ W tym zwisku dźakowaše so mjez druhim zjawnej powšitkownowužitnej Braniborskej towaršnosći za kulturu a stawizny kaž tež Załožbje za serbski lud za podpěru. Kuratorka Sophia Pietryga dźakowaše so předewšěm wuměłcam, z kotrymiž bu přehladka „w běhu wjace hač lěto trajaceho procesa“ zwoprawdźena.