Budyšin (CoR/SN). Snadne wopytowarstwo něhdźe 25 ludźi wotpowědowaše lědma wuznamej koncerta předwčerawšim w Budyskim Serbskim muzeju. Pod hesłom „Ronald Hein a Hiroto Saigusa interpretuja łužiskich komponistow a Roberta Schumanna“ staj z Budyšina pochadźacy spěwar a w Drježdźanach bydlacy japanski pianist zajimcam twórby Korle Awgusta Kocora, Budyskeho komponista Artura Immischa a Roberta Schumanna zahrali. Nimo toho staj dwanaće dotal njeznatych serbskich kompozicijow prěni raz přednjesłoj. Tak zaklinčachu premjernje tři twórby tehdy 15lětneho Jura Mětška, mjez druhim spěw na baladu „Smjertna hora“ Handrija Zejlerja. Zběrku młodych wuměłskich spěwow 2022 zemrěteho Mětška je Ronald Hein pod titulom „Wuměłske spěwy zwjazk 2“ w nadawku Załožby za serbski lud wudał. „Njebě cyle lochko, rukopisne noty a teksty wučitać“, rjekny spěwar a wudawaćel na naprašowanje SN. A to tež za rukopisne kompozicije Bjarnata Krawca na basnje Michała Nawki přitrjechi. Pjeć z nich je awditorium we wobłuku koncerta zasłyšał. Wotpowědne noty za tři hłosy přichodnje wozjewja.