Po twórbomaj „Wětrnik a časy“ a „Hrodźišćo“ su brigadnicy a hosćo „Wulkotnu wodu“ prapremjernje předstajili

Najswojorazniša kajkosć kompozicijow Měrćina Weclicha je, zo zadobudu so spěšnje do wucha, z kotrehož so přespěšnje njezhubja. Tomu njeje nastupajo nowy oratorij „Wulkotna woda“ hinak, tež hdyž so tónraz telko wuchačow njewukopa, kelkož předchadźacej twórbje po­dobneho formata wopytowarjam wobradźištej. Hłowna přičina drje je změna wažneje pozicije: Prěni raz njespisa aranžement Malte Rogacki, z kotrymž je Weclich w běhu lětdźesatkow bjezmała slepje rozumjace so wuměłstwowe partnerstwo dowuwiwał, ale młody multiinstrumentalist a producent Johannes Gerstengarbe. Wulkich stopow sej wědomy drje bě sej wón předewzał, originalnej klawěrnej partiturje swójski rukopis spožčić a so při tym přewuteptanych harmoniskich šćežkow wzdać.