Budyska Serbska wyša a zakładna šula, kotrejž stej wobstatk Serbskeho šulskeho a zetkawanskeho centruma Budyšin,­ swjećitej lětsa 80. jubilej załoženja. Milenka Rječcyna je so ze šulskej nawodnicu wyšeje šule Borboru Krječmarjowej rozmołwjała.

Kotru hódnotu ma Serbska wyša šula Budyšin za Serbow?

Wona je jenička serbska wyša šula w nošerstwje Budyskeho wokrjesa. Tuž mamy w tymle rumje stejnišćo unikata. Wobstaće našeho kubłanišća je tež přichodne lěta wěste, kaž je mi to wokrjes wobkrućił, znajmjeńša přichodne dźesać lět. A wotpowědujo tomu tež na našej šuli dźěłamy.

Dopominaće so na wosebje ćežke wokomiki, kotrež sće jako šulska nawodnica dožiwiła?

Smy jara rjane časy měli a je dale změjemy. Mějachmy pak tež přewšo ćežke časy. Myslu při tym na lěće­ 2012 a 2013. Tehdy smy jako šula kriterije za přistup šulerjow dóstali. To je nas jara wowliwowało. Móžachmy wšak w jednotliwym lětniku jenož hišće jednu rjadownju wutworić. Tón čas smy kolegow kaž tež šulerjow zhubili. Mjeztym pak stejimy na krutymaj nohomaj a smy so w běhu zašłych 13 lět na wuspěšnu mału serbsku šulu wuwili.