Wulku zhromadnosć tworili

pjatk, 09. oktobera 2026

E-Paper: Serbske Nowiny 196

artikl hódnoćić

(0 )

wulkosć pisma Schriftgröße verkleinern Schrift vergrößern

„My smy Budyske“ je šulski hit Budyskeje Serbskeje wyšeje šule, kotryž su šulerjo z podpěru wjacorych partnerow kaž Skupiny Astronawt a Serbskeho ludoweho ansambla składnostnje 80lětneho wobstaća serbskeje šule w Budyšinje předstajili. Na šulskim dworje pokazachu šulerjo wyšeje a zakładneje šule kaž tež Budyskeho Serbskeho gymnazija zhromadnje, zo choreografiju reje a tekst spěwa wobknježa. Milenka Rječcyna

Stawizny serbskeho rěčneho kubłanja w Budyšinje su šulerjow zakładneje a wyšeje šule cyły tydźeń zaběrali

Hesło swjedźenskeho tydźenja na dobro jubileja Budyskeje serbskeje šule rěka zhromadnosć. Na to kładu nawodnistwa zakładneje a wyšeje šule kaž tež horta wulku wažnosć. Přetož swjedźenski tydźeń składnostnje 80. jubileja załoženja šule w sprjewinym měsće charakterizowaše tajku zhromadnosć. Nawodnica horta Grit Lalurny rjekny na zakónčacym swjedźenju na šulskim dworje zašły tydźeń štwórtk: „Ze stron horta je so kubłar Pětr Sćapan na wuradźowanju wobeju šulow a našeho kubłanišća wobdźělił. Smy so na to dojednali, zo jako hort na přikład kołbaski za wšěch pražimy. Mnozy starši našich chowancow su tykancy napjekli. Smy wšelake zhromadne zabawy organizowali. Wjeršk pak běše kermuška šulerjow a něhdyšich wučerjow štwórtk popołdnju w awli našeho Serbskeho šulskeho a zetkawanskeho centruma (SŠZC). Je přeco rjenje, hdyž nas něhdyši šulerjo wopytaja.“

wozjewjene w: Předźenak

Galerija

Wustajeńcu wo stawiznach serbskeje šule w Budyšinje su sej tež serbscy gymnaziasća wobhladali. „Mje to jara zajimuje, dokelž je šula hižo tak stara. Rjenje, zo so tu dale serbsce rěči, dalokož to šulerjo móža“, rjekny Jana Wróblec (nalěwo). Helena Krügarjec (naprawo) měni: „Mje to woprawdźe zajimuje. Moja mać je hižo w tutym šulskim twarjenju wuknyła. Njewědźach, zo je šula hižo tak stara. Mi so wona jara lubi, dokelž je wona historiska a přiwšěm jara moderna. Škoda, zo njejsmy móhli z druhimi na šulskim dworje sobu swjećić.“ A Helena Šnablec (srjedźa) rjekny: „Mje zajimuje, zo šula hižo tak dołho w Budy šinje je. Sym wjele wo njej słyšała. Wšako je tójšto swójbow swoje dźěći na šulu pósłało, zo bychu tu wuknyli. Je to rjana šula z dobrymi wučerjemi.“

Nawoda Zakładneje šule Jablonec nad Nisou Martin Chytka, zastupowaca wjednica Karolína Kopalová, wučerka na wuměnku Heidemarie Polívková (Jablonec) a wučerka na Budyskej Serbskej zakładnej šuli Gabriela Bajtlowa (wotlěwa) pěstuja mnohe lěta trajace styki. W lěće 1999 bě so přećelstwo mjez kubłanišćomaj zahajiło. Byrnjež stajnje ćešo było pjenjezy za wuměnu zdobywać, woni dźěćom hódnotu zwiskow mjez narodami zbližeja.

Šulski nawoda Serbskeje zakładneje šule Budyšin Aleksander Wałda, kiž zastojnstwo wot spočatka aktualneho šulskeho lěta wukonja, a šulska nawodnica Serbskeje wyšeje šule Budyšin Borbora Krječmarjowa. Wona skutkuje w tutej funkciji hižo mnohe lěta a dawa swoje nazhonjenja při nawjedowanju a wuwučowanju rady tež młódšim kolegam dale. Wobaj wěstaj sej wažić, zo steji za nimaj kruty cyłk wučerjow, pedagogow a sobudźěłaćerjow.

wjace z tohole wobłuka: « Jenička serbska wyša šula w Budyšinje « Šansu na jězbu do wukraja dyrbiš wužiwać

Prošu přizjewće so, chceće-li komentar podać

k spočatkej