Młodźi ludźo wotkrywaja sej swět a nawróća so do domizny z tójšto nazhonjenjemi
Štó nochcył jako młody čłowjek swět widźeć a, tak sej to starši wězo přeja, tež něšto nawuknyć? A hdyž tajki přebytk, hač traje tydźenje, měsacy abo snano tež lěto, na kóncu nimale darjeny dóstanješ, potom wulki swět bjezdwěla wabi.
Stipendij puć rubał
Tak znajmjeńša je to Nina Kubańkec, kotraž w Kulowcu bydli, začuwała. Wona chodźi do 10. lětnika Serbskeje wyšeje šule Ralbicy a je dlěje ze stipendijom w Jendźelskej, w měsće Worcester přebywała. „We 8. lětniku je nam naša wučerka Julija Serbinec wo tym powědała, zo móžemy so za stipendij powabić. Sym potom tekst napisała a naprašnik wupjelniła. Njejsym z tym ličiła, zo móžu do wukraja jěć. Wšako so za tajki stipendij šulerjo z cyłeje Sakskeje zajimuja.“
