Kulow. Dohromady 45 młodostnych w starobje wot 15 do 27 lět ze wšitkich dźělow swobodneho stata spěwa w Krajnym młodźinskim chórje Sakskeje. Štóž chce so ze sobustawom tu­toho projektneho ćělesa stać, dyrbi kruty přizjewjenski proces zmištrować. Wot předspěwanja hač k přepruwowanju hudźbnych kmanosćow a techniskich aspektow sej gremij wšitko žada. „To snano wjele klinči, ale hdyž wobsedźiš wěste hudźbne abo spěwanske kmanosće a so přihotuješ, je to woprawdźe docpějomne“, Greta Čórlichec z Kulowa powěda. Wona je tónle proces wuspěšnje zmištrowała a smě so wot lěta 2022 čłonka chóra mjenować. Tež jeje bratr Lukaš Čórlich w nim sobu skutkuje. Wón je 2022 swój studij hudźby a germanistiki na Martina Lutherowej uniwersiće Halle-Wittenberg wuspěšnje zakónčił a po tym masterski studij chóroweho dirigowanja pola Jörga Breidinga na Folkwangowej uniwersiće wuměłstwow w Essenje absolwował.