Budyšin (SN/mb). „Dźeń Saksow“, najwjetši ludowy swjedźeń w swobodnym staće, so klětu prěni raz w lěću wotměje: kónc tydźenja wot 18. do 20. junija we vogtlandskim Plauenje. Dotal je z wašnjom było, jón spočatk septembra wuhotować. Plauen bě wo wuwzaće prosył. To je za Serbow, kotřiž su tradicionalnje na Dnju Saksow zastupjeni, wosebite wu­žadanje, wšako so klětu tři njedźele po tym tež mjezynarodny folklorny festiwal we Łužicy wotměje. Tohodla je Clemens Škoda, kulturny referent Domowiny a čłon kuratorija Dnja Saksow, wčera zjawnu namołwu wozjewił, zo njech serbske towarstwa a kulturne cyłki pruwuja, hač móhli so tola wobdźělić. „To njeje statny wjeršk, ale swjedźeń ciwilneje towaršnosće w Sakskej“, wón w rozmołwje z našim wječornikom wuzběhny. Tohodla je wažne, zo su Serbja jako dźěl towaršnosće tam tež zastupjeni.