Jan Kliman přisłuša mjezynarodnej bojowniskej skupinje NATO

Rukla (StŠ/SN). „Nam wšitkim je jasne, čehodla smy tu w Litawskej. Nimo stajnych zwučowanjow a manewrow staramy so wo naše pancery a hdys a hdys zwostanje tež kusk chwile, sej kraj a wokolinu wobhladać“, Jan Kliman powěda.

Wot julija je młody Serb jako čłon panceroweje brigady 93 němskeho wójska w Litawskej stacioněrowany. Wuchodźiwši Serbski gymnazij w Budyšinje njeměješe prawy plan za sebje a swójski přichod. Tohodla dźěše do wójska, hdźež bu wonej brigadźe w Munsteru přirjadowany. Po jednym lěće so Prawočan rozsudźi, dalše lěto we wójsku wostać. Z tym bě jasne, zo na wěsty čas tež do wukraja póńdźe. „Njejsym rozsud dotal ženje wobžarował. Wězo njeběštaj mać a nan wulce zbožownaj, jako jimaj powědach, zo mje na poł lěta do Litawskeje přesadźa. Tež wonaj wěstaj wo přičinach, čehodla tu němske wójsko scyła je. Přiwšěm pak mje stajnje podpěrataj“, wón zwurazni.