Před 88 lětami buchu Židźa na Žitnych wikach zjawnje hanjeni

Budyšin (SN/MG). 113 prózdnych stólcow na Žitnych wikach bě wčera, póndźelu, skutkowne znamjo za Židowki a Židow, kiž su za čas nacionalsocialistiskeje diktatury město nad Sprjewju wopušćić dyrbjeli. Na kóždy ze stólcow běchu organizatorojo wopominanskeho zarjadowanja wobrazowy ramik stajili. W nim bě na cedli mjeno čłowjeka napisane, kotrehož biografija bě so w času wot 1933 do 1945 raznje změniła. Napodobnjejo židowski swěčnik menoru běchu stólcy w sydom skupinach zestajene. Na dźeń před 88 lětami, potajkim 9. nowembra 1938, běchu so po cyłej Němskej synagogi palili a mob ludźi bě wobchody Židow zničił. W Budyšinje běchu Židowki a Židow 10. nowembra zjawnje na Žitnych wikach hanili. Zamołwitemu zwjazkej TVBunt, kotryž je wčerawše zarjadowanje pod hesłom „Před wočimi wšěch.“ organizował, bě tuž jara wažne, zo wotměje so spomnjeće na městnje tehdyšeho hanjenja.