Hospodarska jednota Łužicy bě w lěće 2020 zwrěšćiła, hdyž je Sakska zhromadny „hospodarski region Łužica“ wopušćiła a swójske struktury natwariła. Nětko tři lěta pozdźišo přewozmje kultura nadawk, hranicu přewinyć: Prěni kulturny forum Łužica dźensa je wupłód wuspěšneho wothłosowanja mjez kulturnym rumom Hornja Łužica-Delnja Šleska w Zhorjelcu a koordinaciskim běrowom „Łužica-kultura“ w Choćebuzu. Knježerstwje w Podstupimje a Drježdźanach samo ze zhromadnej zdźělenku kooperujetej. Krajej so wotměnjatej, konferenca ma so wotnětka kóžde lěto wotměwać, jónu w Delnjej, jónu w Hornjej Łužicy. Samo zhromadnu „marku“ za cyłu Łužicu chcedźa wutworić. Sakska ministerka Klepsch serbski lud eksplicitnje jako wažny faktor syće mjenuje. To je mudre, wšako wučinja jeničce Serbstwo jónkrótnosć Łužicy. Bjez nas skutkowna „marka“ atraktiwneje europskeje Łužicy njebudźe – potajkim hromadźe do dźěła zdar! Marcel Brauman

Domjace myše pytane: Slědźerjo w USA proša wobydlerjow wulkich městow kaž New Yorka, Philadelphije abo Richmonda, zo bychu domjace myše popadnyli a jim přewostajili. Ludźo měli pasle nastajić a zwěrjata žiwe popadnyć. Slědźerjo chcedźa zwěsćić, kak su so hrymzaki na čłowjekow zwučili, hač su w městach snadź mjenje spłóšiwe abo hač maja čłowjeka dla mjenje stresa. Projekt přepy­tuje tež ćělne rozdźěle myšow – hač su w městach wjetše hač na wsach.

Powětr z wobručow 70 awtow wotpušćili su njeznaći w nocy na štwórtk w Podstupimje w měšćanskim dźělu Babelsberg. Skućićeljo zawostajichu poselstwa, z kotrymiž protestowachu přećiwo wysokej přetrjebje bencina a diesela tutych awtow. Policija pruwuje, hač steji akcija w zwisku z podobnymi njeskutkami w druhich dźělach Podstupima.

Platforma za dobru serbšćinu, čiłu diskusiju a integraciju nowych Serbow

Hdyž ći něchtó w bjezporočnej serbšćinje rozkładźe, zo nažel cyle porjadnje njeserbuje – potom sy na zetkanju Serbskeho ewangelskeho towarstwa (SET). Dalše wosebite přiznamjo, kotrež su tež na lětušej hłownej zhromadźiznje pěstowali, je čiła a cyle wotewrjena diskusija wo wšelakich temach. Tak je so na přikład Helmut Grós z Hornjeje Hórki prašał, čehodla serbski rozhłós rańše „słowo k dnjej“ njewusyła kóždu hodźinu, ale jenož trójce. Roman Nuk, redaktor MDR a jako rozprawjer přitomny, njeje to wotpokazał, ale na to skedźbni, zo je ludźi, kotřiž serbski rozhłós dlěje hač hodźinu słuchaja. Kelko wospjetowanja ma zmysła?

Sylna stronka SET je tež sensibilita, z kotrejž přidružnikow do serbstwa integruje. Nimo Handrija Sembdnera je dalši entuziast z Drježdźan z čłonom SET a je sej na hłownu zhromadźiznu dojěł: Arnim Busch, kotryž bě najprjedy čěsce nawuknył a nětko sej awtodidaktisce serbšćinu přiswoja.

Berlin (dpa/SN). We wjele wobkedźbowanym widejowym poselstwje je wicekancler Robert Habeck (Zeleni) antisemitizm w Němskej raznje zasudźił a sej solidaritu ze Židami žadał. „Antisemitizm nje­tolerěrujemy, w žanej formje, w žanej. Rozměr hidy na islamistiskich demonstracijach w Berlinje a druhich městach Němskeje njeje akceptabelny a trjeba raznu politisku wotmołwu“, rjekny zwjazkowy minister za hospodarstwo na internetnej platformje X (něhdy Twitter).

Sprostnjena wójna wulki strach

Kijew (dpa/SN). Pozemska wójna w Ukrainje je sprostnjena. Tole ma wyši rozkazowar ukrainskeho wójska Walerij Salušnyj za najwjetši strach. Jenož technologiski předskok móhł wupuć z wójny stejnišćow być, rjekny general britiskim nowinarjam. „Wójna stejnišćow traje ­dołho a wunjese ukrainskim jednotkam a wšemu statej wulke rizika.“ Stagnacija na bitwišću pomha jenož Ruskej, kiž móže tak straty swojeho wójska wurunać.

Migranća po puću do USA