Berlin (dpa/SN). Zwjazkowa kanclerka Angela Merkel (CDU) žada sej sprawniše rozdźělenje ćěkancow po wšej Europje. „Dublinske zrěčenje nowym wobstejnosćam hižo njewotpowěduje“, rjekny wona wčera w sćelaku ARD. Staty EU dyr­bjeli k fairnemu rozdźělenju ćežow dóńć, rjekny Merkel hladajo na dźensnišu konferencu­ nutřkownych ministrow EU w Brüsselu. Tam chcedźa rozsudźić, kak něhdźe 60 000 ćěkancow w Europje rozdźělić. Po tymle puću chcyli krajam kaž Italskej a Grjekskej pomhać, hdźež wosebje wjele ćěkancow z čołmami dochadźa. Dotal njemóžachu so wo tym dojednać.

Berlin (dpa/SN). Z kładźenjom wěncow w Berlinskim wopomnišću Plötzensee a z spřisahanjom rekrutow Zwjazkoweje wobory su dźensa žony a muži spjećowanja přećiwo Adolfej Hitlerej wopominali. Dźens před 71 lětami bě atentat na Hitlera zwrěšćił. W něhdyšim jastwje Plötzensee, hdźež mnohich přiwisnikow spjećowanskeho hibanja po tym wotprawichu, staj prezident Zwjazkoweje rady Volker Bouffier a zakitowanska ministerka Ursula von der Leyen dźensa wěnc połožiłoj. Na wopominanju wobdźěli so tež kulturna statna sekretarka Monika Grütters (wšitcy CDU). Na centralnym zarjadowanju zwjazkoweho knježerstwa rěčeštaj Berlinski knježacy měšćanosta Michael Müller (SPD) a předsyda Němskeho dźěłarniskeho zwjazka DGB Reiner Hoffmann. Wječor bě swjatočne spřisahanje 400 nowych wojakow na paradowym naměsće při Bendlerowym bloku w Berlinje předwidźane. Tam běchu hišće 20. julija 1944 wječor oficěra Wehrmachty Clausa Schenka hrabju von Stauffenberga a dalšich sobuwojowarjow zatřělili.

Tajny přihot slěborneho kwasa je sobotu w mecklenburgsko-předpomorskim Runowje zasadźenje policije zawinił: Žona bě wokoło 23 hodź. dwě „podhladnej postawje“ na susodnej ležownosći wobkedźbowała. Tukajo na paduchow za­woła wona policiju. Při přepruwowanju so wukopa: „Paduchaj“ běštaj syn susoda a toho towarš. Wonaj chcyštaj składnostnje slěborneho kwasa dom ze slěbornej foliju wupyšić.

Wopica je prošerjam w jednym z indiskich templow njewočakowany pjenježny dar wobradźiła. Do toho bě wona móšeń žony spakosćiła. Na muri sedźo mjetaše wopica na to pjenjezy w hódnoće wjace hač 2 000 eurow mjez ludźi, kotřiž bankowki dźakownje zezběrachu. Wobsedźerka zamó jedno snadny dźěl swojich pjenjez zaso zhromadźić, kaž indiske nowiny rozprawjeja.

Njewjedro howriło

Choćebuz (dpa/SN/ch). W běhu jenož dweju hodźin dyrbjachu wohnjowi wobornicy sobotu popołdnju na juhu Braniborskeje na něhdźe 25 zasadźenjach spowróćane štomy a zwottorhane hałzy rumować, informuje rěčnik regionalneho běrowa Łužica w Choćebuzu. Nóc pak wosta měrna. Nichtó njebu zranjeny. Němska wjedrowa słužba bě za wokrjesaj Łobjo-Halštrow a Sprjewja-Nysa před njewjedrami warnowała. Na železniskej čarje Choćebuz–Lipsk dyrbješe blisko Schöneberga wosobowy ćah zastać, dokelž bě štom horni milinowód potorhnył.

Přirodoškitarjo zwrěšćili