Drježdźany/Lipsk (dpa/SN). Hladajo na nachilace so lěto 2021 a silwester płaća w Sakskej wot dźensnišeho přiwótřene naprawy za priwatne zeńdźenja. Dotal běchu zetkanja za hač do 20 šćěpjenych a wustrowjenych dowolene, nětko pak je to jenož hišće za maksimalnje dźesaćoch móžno. Dźěći a młodostni pod 16 lětami so sobu njeliča. Ručež pak su nješćěpjeni přitomni, su jenož hišće zeńdźenja mjez jednej domjacnosću a jednej dalšej wosobu dowolene. Dale maja so w zarjadnišćach, zawodach, wobchodach a zarjadach FFP2-nahubniki wužiwać.

Na zjawnych městnach su silwesterske a nowolětne swjedźenje zakazane. Tež praskotaki njesmědźa so lětsa zapalić. Lěkarjo Lipšćanskeho uniwersitneho klinikuma naprawu jara witaja. Minjene lěto mějachu wo wjele mjenje pacientow, kotrychž dyrbjachu w zwisku z wopačnym wužiwanjom praskotakow lěkować.

Karlsruhe (dpa/SN). Zwjazkowy sejm ma najspěšnišo wo naprawach k škitej zbrašenych w tak mjenowanych padach triage rozsudźić, zdźěli dźensa Zwjazkowe wustawowe sudnistwo w Karlsruhe. Zakonjedawar ma zamołwitosć žiwjenje škitać tež w času pandemije. Zwjazkowy sejm njeje swoje nadawki spjelnił. Dźewjeć ludźi ze zbrašenjemi a chorosćemi su skóržbu wustawowemu sudnistwu zapodali, dokelž so starosćachu, zo so lěkarjo jich pandemije dla wzdaja. Lěkarjo maja po situacijach z mało intensiwnymi łožemi rozsudźić, koho wuchowaja a koho nic.

Berlin (dpa/SN). Katastrofy zapławjenja, wichory a njewjedra: Hišće nihdy njetrjebachu zawěsćernje w Němskej tak wulke škody narunać kaž lětsa. „Ze zawěsćenymi škodami na domach, domjacej potrjebje, zawodach a jězdźidłach něhdźe 12,5 miliardow eurow je lěto 2021 najdróše lěto přirodnych wohroženjow wot spočatka statistiki w 1970tych lětach“, rjekny hłowny jednaćel zwjazka němskich zawěsćernjow Jörg Asmussen wčera w Berlinje. Najwjetši dźěl škodow, 8,2 miliardźe, su zahubne zapławjenja w juliju w Porynsko-Pfalcy a Sewjerorynsko-Westfalskej načinili. 7,7 miliardow z toho dyrbjachu za wobškodźene domy, domjacu potrjebu a zawody wudać, 450 milionow za wobškodźene jězdźidła. Ćežke njewjedra z krupami běchu w juniju wulke škody na jězdźidłach zawostajili.

Lěto 2021 njeje jenož w Němskej, ale tež po wšěm swěće najdróše lěto za zawěsćernje. Srjedź decembra bě zawěsćernja Swiss Re wot přirodnych katastrofow zawinowane škody na 93 miliardow eurow trochowała.

Braniborska chce ludźi wo lěpšinach wosobinskeho škita přeswědčić

Podstupim (dpa/SN). Nutřkowny mi­nister Braniborskeje Michael Stübgen (CDU) je so přećiwo winowatostnemu šćěpjenju korony dla wuprajił a so nadźija, zo da so hišće wjele ludźi dobrowólnje šćěpić. „Mam debatu wo winowatostnym šćěpjenju za lochkomyslnu, dokelž wotpohladane wuslědki njewunjese a dokelž njemóže tole tuchwilu naša tema być“, rjekny minister Podstupimskim nowinarjam. „Dyrbimy so wo to po­starać, zo je dosć šćěpiwa k dispoziciji a kak móžemy ludźi k šćěpjenju pohnuwać.“

Stübgen so nimo toho boji, zo winowatostne šćěpjenje towaršnostnu debatu dale přiwótři – do wopačneho směra. „Njejsym swoju nadźiju hišće spušćił, zo móžemy wulki dźěl ludźi tola hišće wo trěbnosći šćěpjenja přeswědčić“, wón rjekny. Přirunujo z lěćom je mjeztym podźěl ludźi zaso přiběrał, kotřiž chcedźa so dobrowólnje prěni króć šćěpić dać. „Tych bě minjene tydźenje něhdźe 80 000, dwójce telko, kaž tuchwilu prawidłownje demonstrować chodźi.“