Frankfurt n. M. (dpa/SN). Hač do kónca januara podlěšeny lockdown je wosebje staršim z mjeńšimi dźěćimi wulke wužadanje. „Twarscy dźěłaćerjo, rjedźerki a rjedźerjo domow njemóža wot doma dźěłać a tam swoje dźěći dohladować.“ To měni šef dźěłarnistwa twarstwo-agrar-wobswět Robert Feiger, žadacy sej wjetšu podpěru potrjechenym dźěławym.

„Předwidźane podwojenje chorobnych dnjow za dźěći njedosaha. Dźěławi budu snano hižo w januaru k tomu nućeni swój lětny dowol brać, zo móhli dohlad dźěći zaručić.“ Po słowach dźěłarnika pak měli starši móžnosć połnje zapłaćeneho wosebiteho dowola dóstać. Dotalne zarunanje, po kotrymž dóstawaja přistajeni 67 procentow netto-mzdy, hdyž swoje dźěći doma dohladuja, njeje akceptabelne. „Runje w branšach, hdźež dźěławi mjenje zasłužeja, njeměła jim žana pjenježna škoda nastać“, Feiger wuswětla.

Jenož wěsty dźěl powołanjow, ke kotrymž na přikład strowotniski wobłuk słuša, je za system relewantny. Přistajeni smědźa swoje dźěći tuž w pěstowarni abo horće nuzowje dohladować dać. W mnohich branšach to móžno njeje.

Paduch w sewjerorynskim-westfalskim Windecku bě so do domu porika zadobył a tam tři laptopy, šmóratko a pjenjezy spakosćił. Naposledk je nuznik wužiwał, hdźež wobydlerka jeho lepi. Rozhorjena so wona njeznateho wopraša, štó je a što chce. Zadobywar chětře stany, hrabny sej pućowanski wačok, kotryž bě ­tohorunja pokradnył, a so zminy. Jeho „zawostajenstwo“ w nuzniku dyrbješe přećel žony wotstronić.

Saznicy chcedźa image čornych zwěrjatow polěpšić. Tajkich maja mjenujcy w zwěrjatownjach nadosć, dokelž ludźo čorne zwěrjata z njezbožom zwjazuja. Zjednoćenstwo saznikow w Berlinje je tuž kalender ze zwobraznjenymi saznikami a čornymi zwěrjatami kaž psami, kóčkami a nuklemi wudało. Prěnje 500 eksemplarow je hižo předatych. Dobytk chcedźa zwěrjatownjam přewostajić.

Lěto 2021 přinjese přetrjebarjam nimo mnohich wolóženjow tež te abo tamne poćeženje

Lěto 2021 je hakle něšto dnjow stare a přinjese nam nimo prěnjeho sněha po dwěmaj lětomaj znowa tež tójšto nowosćow. Zwjazkowe knježerstwo je mjez druhim wobzamknyło, zo dóstanu starši wjac dźěćaceho pjenjeza, wuměnkarjo z poměrnje małej rentu móža so na přiražku wjeselić. Dale njetrjebaja mnozy wot lětušeho hižo žanu solidarnu přiražku płaćić, a nastupajo škit klimy nabywaja nowe naprawy wot­nětka płaćiwosć: Tak so mjez druhim ćěriwo kaž tež dawki na přikład za SUVje po­dróša. Najwažniše nowosće smy za was znosyli.

Dźěćacy pjenjez a přiražka za dźěći

Z nowym lětom zwyši knježerstwo dźěćacy pjenjez. Za prěnje a druhe dźěćo rozrosće měsačna suma wo 15 na 219 eurow. Za třeće syda wotnětka 225 město dotal 210 a za štwórte město 235 samo 250 eurow wob měsac. Bjezdawkowu sumu za dźěći (Kinderfreibetrag) zwyša w Němskej wo wjac hač 500 na 8 388 ­eurow. Tež swójby z dźěćimi, kotrež maja mało dochodow, maja z toho swoje lěpšiny. Přiražka za dźěći (Kinderzuschlag) za tajke swójby měsačnje wo 20 eurow na maksimalnje 205 eurow přiběra.

Zymske prózdniny w Sakskej budu jenož jedyn tydźeń a hnydom wot 1. do 5. februara, tamny tydźeń chcedźa do jutrow nachwatać. To planuje knježerstwo w nowym škitnym postajenju korony dla, kotrež chce pjatk wobzamknyć.

Drježdźany (SN). W diskusiji wo móžnym šmórnjenju zymskich prózdnin je so sakske knježerstwo wčera tola hišće na kompromis dojednało. Prózdniny budu prjedy a krótše, wujasni kultusowy minister Christian Piwarz (CDU) po posedźenju kabineta w Drježdźanach. „Wu­knjenska přestawka“ za šulerjow a wučerjow budźe na prěni februarski tydźeń doprědka sćehnjena. Tamny prózdninski tydźeń ma so w martrownym tydźenju do jutrow nachwatać.

Kultusowe ministerstwo zdobom na to skedźbni, zo móža so šulerjo, kotrychž starši su dołhodobnje za zymske prózdniny dowol planowali, so z wopodstatnjenej próstwu pola wjednistwa šule wot šulskeje wučby wuswobodźić dać. Za wučerki a wučerjow tajke rjadowanje po tuchwilnym stawje njepłaći, kaž to nam rěčnica ministerstwa wobkrući.