Berlin (dpa/SN). Społnomócnjeny Pólskeje za čłowjeske prawa Adam Bodnar je diskriminowace wuprajenja kandidata w prezidentskim wólbnym boju přećiwo splažnym mjeńšinam kritizował. „Njeje žanych wobstejnosćow, tež wólbneho boja nic, kotrež bychu wothódnoćenje towaršnostneje skupiny a homofobnu retoriku woprawnili“, Bodnar wčera rjekny. Wot narodno-konserwatiwneje knježerstwoweje strony PiS nastajeny kandidat, amtěrowacy prezident Andrzej Duda, bě na wólbnobojowym zarjadowanju wo homoseksualnych rjekł: „Chcedźa nam napowědać, zo su to čłowjekojo. Je pak to jenož ideologija.“
Schröder za nawrót Ruskeje
Berlin (dpa/SN). Bywši zwjazkowy kancler Gerhard Schröder so za to wupraja Rusku zaso do rjadow skupiny statow G7 přiwzać, kotraž by so potom zaso z G8 stała. „Njemóžemy kraj, kiž je stajny čłon Bjezstrašnostneje rady Zjednoćenych narodow a ma prawo na weto we wšěch prašenjach swětoweje politiki, prosće izolować“, rjekny politikar SPD w interneće. „Bjez Ruskeje njehodźa so mjezynarodne problemy rozrisać.“
Demonstruja za wyše mzdy
Berlin (dpa/SN). FDP je zwjazkowy sejm namołwjała knježerstwu wosebite prawa zaso sćazać, kotrež bě jemu sejm koronapandemije dla spožčił. Tuchwilne połoženje w Němskej „wosebite prawa knježerstwa hižo njewoprawnja“, praji nutřkopolitiski rěčnik Konstantin Kuhle powěsćerni dpa. Dale wón rozłoži: „Epidemiske połoženje narodneho rozměra, z kotrymž hodźa so prawa parlamenta wobmjezować, hižo njewobsteji.“ Na lokalne wudyrjenje koronawirusa móža kraje a komuny po zakonju wo škiće před infekcijemi sami reagować. „Zwjazkowy sejm dyrbi nětko jednać.“
Strowotniskopolitiska rěčnica frakcije FDP Christine Aschenberg-Dugnus rjekny powěsćerni: „Mjeztym zo mějachmy za čas wobzamknjenja w měrcu wšědnje 4 000 do 6 000 nowych infekcijow, je jich tuchwilu hišće 200 do 400.“ Strach přećeženja narodneho strowotnistwa wjace njewobsteji. „W Schleswigsko-Holsteinskej lěkuja tele dny hišće pjeć pacientow na koronawirus w chorownjach. To pokazuje, zo je regionalnje diferencowane postupowanje trěbne. Epidemiske połoženje dyrbi sejm tuž zaso zběhnyć.“
Berlin (dpa/SN). Bjezposrědnje po wotewrjenju měsacy dołho zawrjeneje mjezy k Pólskej je so němski wonkowny minister Heiko Maas (SPD) dźensa do susodneho kraja podał. Tam wočakowaše jeho wonkowny minister Jacek Czaputowicz. Rozmołwjeć chcyštaj so wo boju přećiwo koronawirusej kaž tež wo europskopolitiskich temach hladajo na to, zo přewozmje Němska 1. julija předsydstwo Rady EU, zastupnistwa čłonskich statow Europskeje unije. Bjezdwěla bě tež wěstotna politiska tema wažny dypk rozmołwow, tak plany prezidenta USA Donalda Trumpa, kontingent 34 500 ameriskich wojakow w Němskej wo 9 500 pomjeńšić. Pólska drje so nadźija, zo USA ličbu swojich wojakow wot tuchwilu 5 000 w kraju dale powjetši, štož pak njesměło na kóšty jednotkow w Němskej być.
Jězba do Pólskeje je mjeztym pjata wukrajna jězba Maasa po dźesać tydźenjow trajacej přestawce koronawirusa dla. Wón bě hižo w Luxemburgu, Nižozemskej, Israelu a Jordaniskej. Pólska bě swoje mjezy 15. měrca za wukrajnikow zawrěła.
Drježdźany/Podstupim (dpa/SN). SPD w Sakskej žada sej tež w swobodnym staće, zo wustawoškit AfD jeje prawicarskoekstremnych tendencow dla wobkedźbuje. Wustawowy škit stronu AfD z połnym prawom w Braniborskej a Durinskej wobkedźbuje, rjekny generalny sekretar sakskeje SPD Henning Homann wčera w Drježdźanach. „Wočakuju wot sakskeho wustawoškita, zo nětko prawicarskoekstremistiske wuwiće w AfD tež w Sakskej wobkedźbuje.“
Nawodnistwo sakskeje AfD z krajnym předsydu Jörgom Urbanom a generalnym sekretarom Janom Zwergom je minjenu sobotu w Sebnitzu zhromadnje z bywšim braniborskim krajnym předsydu Andreasom Kalbitzom wustupowało. Zjawne wuznaće solidarity „z wočiwidnym fašistom Andreasom Kalbitzom“, pokazuje, kajki duch nawodnistwo AfD w swobodnym staće pěstuje. „AfD njeje w Sakskej žana konserwatiwna strona, jako kajkaž so w zjawnosći rady wudawa, ale zeskupjenje prawicarskich ekstremistow abo tež karjeristow, kotřiž za politisku móc tež z fašistami paktěruja“, Henning Homann kritizuje.
Pjenjez w płucach pacienta namakali su lěkarjo we westfalskim Hammje. Muž bě centowy pjenježk w januaru při darće mylnje spóžěrał. Fachowcy za płuca su jemu cuzy předmjet wuspěšnje wuoperowali, po tym zo bě so z kašelom a zahorjenymi płucami lěkarjej předstajił. Muž bě sej při hrě ze centom w hubje hrajkał, jako jemu towarš na ramjo klepny a wón pjenjez na to do so srěbny.
Z gumijowym čołmom Ryn přeprěčił je muž w Bonnje. Pěšk bě wohnjowu woboru informował, zo jědźe po rěce čołm w formje flaminga. W nim leži muska wosoba, kotraž na wołanje njereaguje. Centrala pósła 45 wobornikow a helikopter. „Po intensiwnym pytanju“ su muža skónčnje na tamnym brjohu Ryna čiłeho našli. Wobornicy wšak dyrbjachu jeho powučić, zo je rěku z tajkim „jězdźidłom“ přeprěčić přewšo strašne.
Rom (B/SN). Wudawki za wobrónjenje su loni po cyłym swěće tak jara rozrostli kaž minjene dźesać lět nic. Tak inwestowachu USA jeničce loni cyłkownje 732 miliardow dolarow do swojeho wojerstwa, zdźěli slědźerski institut za měr Sipri w Stockholmje. Nimo Ameriki mějachu najwjetši wojerski etat China, Indiska, Ruska a Sawdi-Arabska, štož wučinješe 62 procentow wšěch swětowych wojerskich wudawkow. Němska ležeše loni za Francoskej na 7. městnje a suny so tak porno lětu 2018 wo dwě městnje doprědka. Wot časa globalneje financneje krizy 2008 je so trend wobrónjenja strašnje pospěšił, informowachu měrowi slědźerjo w powěsćach Vatikana.
Kak dale po synodalnym puću?
Berlin (dpa/SN). Po zběhnjenju warnowanjow před pućowanjemi do druhich europskich krajow je dźensa rano zaso wjace ludźi na Tegelske a Schönefeldske lětanišćo w Berlinje přišło. Na kóždym z lětanišćow pak bě jenož jedyn terminal za wotlěty a přizemjenja k dispoziciji. Cyłkownje planowachu 80 wotlětow a přizemjenjow w Berlinje, hewak je jich wšědnje něhdźe tysac.
Brexit nětko wěc šefow
Brüssel (dpa/SN). Wjerškowe zetkanje Europskeje unije z Wulkej Britaniskej měješe dźensa nowy rozmach do dlijacych so rozmołwow wo wikowanskim zrěčenju po brexiće přinjesć. Na widejowej konferency z premierministrom Borisom Johnsonom wobdźělichu so za EU prezidentka komisije Ursula von der Leyen, prezident Rady EU Charles Michel a prezident parlamenta EU David Sassoli. Fachowcy njeběchu wot měrca najebać intensiwne jednanja ničo docpěli.
Policajskej kulce wina byłoj