Čakaja na rozsud Zelenych
Podstupim (dpa/SN). Zo móhło čerwjeno-čorno-zelena koalicija w Braniborskej dźěłać započeć, pobrachuje hišće přihłosowanje Zelenych. Dźensa nawječor chcychu woni zdźělić, kak je woprašowanje čłonow strony wušło. Dopołdnja su započeli, wólbne urny wotwěrać a wólbne lisćiki wuličić.
Při woprašowanju njeje jenož wo koaliciske zrěčenje šło, ale tež wo personalnu naležnosć: Nawodnistwo strony bě namjetowało, zo měła so Ursula Nonnemacher z ministerku za strowotnistwo a socialne stać, Axel Vogel měł ministerstwo za ratarstwo a wobswět přewzać.
Potencielnej koaliciskej partneraj stej tak mjenowanemu keniaskemu zwjazkej pod nawodom SPD hižo přihłosowałoj. SPD bě so na wurjadnym zjězdźe minjeny pjatk z wjace hač 99 procentami za koaliciske zrěčenje wuprajiła, CDU je sobotu ze 97 proc. „zelenu swěcu“ dała.
Mjez Zelenymi jewješe so dotal najwjace kritiskich hłosow. Při probowym wothłosowanju tydźenja na zjězdźe běchu 81,4 procenty za keniaski zwjazk.
Spěšniša digitalizacija trěbna
Klawsura zwjazkoweho knježerstwa w braniborskim Mesebergu
Meseberg (dpa/SN). Zwjazkowy wobchadny minister Andreas Scheuer (CSU) žada sej spěšniše postupowanje w zwisku z wutwarom mobilnoškričkoweje infrastruktury. Tuchwilu w něhdźe tysac padach na wotpowědne dowolnosće čakaja, skoržeše Scheuer sobotu wječor na kromje klawsury zwjazkoweho knježerstwa w braniborskim Mesebergu. Němska dyrbjała tempo powjetšić. Za to trěbne su dalše rozmołwy z krajemi a komunami. Nimo toho ma politika mjez wobydlerjemi wo zrozumjenje wabić. Lěpša digitalizacija wotpowědnych kónčin kraja je jeničce z wutwarom mobilnoškričkoweje infrastruktury móžna.
Hladajo na wutwar digitalneho zarjadnistwa rjekny swójbna ministerka Franziska Giffey (SPD), zo měli wobydlerjo přichodnje wšitke próstwy jednorišo a spěšnišo internetnje zapodać móc. Dźe wo to, běrokratiju pomjeńšić a socialny stat efektiwniši sčinić. Wuměnjenje za to je, mobilnoškričkowu infrastrukturu rozšěrić.
Albansku přesćahnyć!
To a tamne (18.11.19)
Pjaneju šoferow lepiła je policija w Kamjenicy, kotrajž běštaj po wobchadnym njezbožu městno za wodźidłom awta měnjałoj. Chětro wobškodźene jězdźidło wobsadce policajskeho awta napadny. Za wodźidłom sedźeše 29lětny bjez jězbneje dowolnosće. Při pytanju za městnom njezboža so wukopa, zo bě 33lětny z awtom jěł a do wobhrodźenja zrazył. Tón měješe jedyn promil, 29lětny samo 1,3 promile alkohola w kreji.
Kulacy so kirbs je w saksko-anhaltskim Havelbergu wobchadne njezbožo zawinił. Kirbs bě so na dróhu kulił. 64lětna šoferka wosoboweho awta njemóžeše hižo borzdźić a zrazy do płoda. Při tym so lěwy prědni bok awta wobškodźi. Kriminalna policija ma kulacu so banju za wobchadny zadźěwk a přepytuje nětko přećiwo jeje wobsedźerjej. Toho pak dyrbi najprjedy raz wuslědźić.
Zepěranišćo USA nětko ruske
Moskwa (dpa/SN). Ruska wojerska policija je po swójskich informacijach naposledk wot USA wužiwane lětanišćo na sewjeru Syriskeje přewzała. „Smy započeli lětanišćo a wojerske zepěranišćo wobstražować“, rjekny zastupnik wójska powěsćerni Tass. Wojacy USA běchu objekt njedaloko namjezneho města Kobane hakle srjedu wopušćili. Tam maja klimatizowane rumnosće a samo fitnesowe studijo. Na lětanišću maja helikoptery stać, kotrež wěstotu rusko-turkowskich patruljow na syrisko-turkowskej mjezy zaruča.
Klimowy paket wobzamknjeny
Berlin (dpa/SN). Zwjazkowy sejm je dźensa wulki dźěl klimoweho paketa zwjazkoweho knježerstwa wobzamknył. Z nim chcedźa wustork wuhlikoweho dioksida kaž tež lětanje podróšić, powołanskich dojězdźowarjow podpěrać a ponowjenje twarjenjow spěchować. Planam CDU/CSU a SPD so w rjadach opozicije a w zwjazkowych krajach raznje spjećuja. Tuž je derje móžno, zo Zwjazkowa rada zakoń na wšelakich městnach hišće změni. Zadźěwać pak jemu njemóže.
Trump ćehnje před sudnistwo
Něhdźe sto zastupnikow městow a wsow łužiskeje brunicoweje ...
Sakska CDU ma wupruwowanych ludźi
Drježdźany/Markneukirchen (dpa/SN). Sakska CDU chce so z wupruwowanym personalom do zhromadneje knježerstwoweje koalicije z SPD a Zelenymi podać. Na krajnym zjězdźe strony jutře w vogtlandskim Markneukirchenje chce ministerski prezident Michael Kretschmer znowa jako krajny předsyda kandidować. Jako městopředsydźa kandiduja socialna ministerka Barbara Klepsch, frakciski předsyda Christian Hartmann a minister za wobswět Thomas Schmidt. Ze stronskeho zjězda ma signal jednoty wuchadźeć, rjekny generalny sekretar Alexander Dierks wčera w Drježdźanach. Mustwo bě tež w jara ćežkej situaciji „stało kaž jedynka“, rjekny wón hladajo na minjene měsacy. Wobkedźbowarjo su sej wěsći, zo Kretschmer po swojim znowawuzwolenju Dierksa znowa za generalneho sekretara strony namjetuje.
Lěwica analyzuje wólbnu poražku
Drježdźany (dpa/SN). Sakska Lěwica schadźuje so kónc tydźenja w Drježdźanach na stronskim zjězdźe, zo by wo přichodnym wusměrjenju strony wuradźowała. Dźensa wječor chcedźa najprjedy raz na wólbnu poražku 1. septembra zhladować. Pod hesłom „Ke stronskej krizy a jeje přičinam“ zeńdźe so 200 towaršow w Drježdźanskej wikowej hali. Zakładny dokument zjězda ma titul „Zazběh 2020“. W nim so mjez druhim starosća, zo je přichod towaršnostnje wuznamneje socialistiskeje strony wohroženy.
Lěwica bě při wólbach krajneho sejma w swobodnym staće runje hišće 10,4 procenty hłosow dóstała a swoju wodźacu opozicisku rólu na dobro AfD zhubiła. W sejmje je Lěwica jenož hišće ze 14 město dotal 27 zapósłancami zastupjena. Njedźelu steja wólby noweho krajneho předsydstwa a narěč předsydy Bernda Riexingera na programje.
To a tamne (15.11.19)
Zastojnstwo społnomócnjeneho za wosamoćenych njebudźe w Berlinje zarjadowane. To je Dom zapósłancow wčera wobzamknył. Frakcija CDU bě sej społnomócnjeneho žadała, dokelž je runje we wulkoměstach kaž Berlinje dźeń a wjace ludźi wosamoćenych, mjeztym pječa kóždy dźesaty. Berlin je město z najwjace single-domjacnosćemi w Němskej.
Z wubědźowanskim awtom formule 2 bě muž na čěskej awtodróze po puću. Tójšto šoferow so njemało dźiwaše, jako čerwjeny wóz w srjedźnej Čěskej nimo smaleše. To pak změje sćěhi. Policija je 45lětneho šofera mjeztym wuslědźiła. Dokelž nima 600 PS sylne awto dowolnosć, po normalnych dróhach jězdźić, dyrbi jeho wodźer 400 eurow pokuty płaćić a jězbnu dowolnosć na lěto wotedać. Jězdźidło nima ani čisłowu tafličku, swětłomjetakaj a směrowe lampki.
Trump słyšenje kritizuje
Washington (dpa/SN). Prezident USA Donald Trump je prěnje zjawne słyšenje swědkow w zwisku z planowanym wotsadźenjom prezidenta wótrje kritizował. To njeje ničo druhe hač „přesćěhanje“ a „směšk“, rjekny wón we Washingtonje. „Njejsym sej to wobhladał.“ Město toho zetka so z turkowskim prezidentom Recepom Tayyipom Erdoğanom, štož bě jemu wažniše. Wumjetowanje swědkow, zo je swoje zastojnstwo znjewužiwał, Trump jako njewěrne wotpokazuje.
Přiměr wujednany
Gaza (dpa/SN). Po najnowšej eskalaciji namocy w Gazaskim pasmje stej so Israel a militantna organizacija Palestinjanow Islamski dźihad na přiměr dojednałoj, kotryž płaći wot dźensnišeho ranja. Pósłanc egyptowskeho knježerstwa je mjez stronomaj posrědkował. Do toho bě při israelskich nalětach na Gazaske pasmo znajmjeńša šěsć ludźi žiwjenje přisadźiło. Nalěty běchu reakcija na rakety, kotrež běchu Palestinjenjo minjene dny do směra na Israel startowali.
Kandidaća so předstajili
