„Sonić – to tla z hrěchom njej‘“ je titul ­prěnjeje serbskeje cross-medialneje knihi, kotraž njewobsahuje wo Měrćina Weclichowym hudźbnym tworjenju jenož ­teksty a fotografije, ale zdobom awdija a wideja, kiž móže sej čitar z pomocu ­QR-codow na swojim šmóratku abo druhim mobilnym nastroju njeposrědnje pódla knihi naposkać resp. wobhladać. Tale inowatiwna nowostka bě sobu z přičinu, zo bu LND spočatk tohole tydźenja w Lipsku ze Sakskim nakładniskim mytom počesćene. Wot 131 sakskich na­kładnistwow je so na wubědźowanju 84 wobdźěliło, 20 z nich bu mytowanych. Z tajkim wuznamjenjenjom njeje jenož mytowanski pjenjez zwjazany, nad kotrymž so w času powšitkowneho podró­šenja kóždy wjeseli. Runje tak wužitne je, zo stanu so mytowane nakładnistwa ­widźomne, zo so wo nich w zjawnosći rěči a pisa. Tajke wašnje wabjenja je kóždemu předawarjej witane.

„Serbski spěwanski swjedźeń“ w Budyskej „Krónje“ bu ze stron zarjadowarjow – Załožba za serbski lud, Domowina, Serbski ludowy ansambl a Zwjazk serbskich spěwarskich towarstwow – jako wjeršk Lěta Zejlerja a Kocora 2022 připowědźeny, a hižo hladajo na ličbu sobuskutkowacych hodźi so rjec, zo z tym přewjele přilubili njejsu. Dohromady něhdźe 350 spěwarkow a spěwarjow z cyłkownje 14 łužiskich chórow a hudźbnych cyłkow – cyrkwinski chór Chrósćicy, Hostakec trójka, chór Bratrowstwa, chór Budyšin, chór Łužyca, chór Lipa, chór Meja, chór 1. Serbskeje kulturneje brigady, chór Serbskeho ludoweho ansambla, chór Worklečan kapałki, chór Židźino, Serbski muski chór Delany, skupina Wólbernosće a Studentski chór – je swjatk 29. winowca wuhotowało, štož woznamjenja dotal najwjetše serbske zetkanje tajkeho razu w 21. lětstotku.