Z wudaća: póndźela, 26 junija 2017

Štyrjo zranjeni po njezbožu

Njebjelčicy. Ćežke wobchadne njezbožo sta so wčera nawječor na statnej dróze S 94 pola Njebjelčic. Při wotbóčce do Kamjenca zajědźe VW z dotal njeznateje přičiny na lěwy bok jězdnje a so wjacore razy přewali. 43lětny wodźer awta, 43lětna sobujěduca kaž tež dźěsći w starobje dwanaće a wosom lět so zranichu.

„Buona sera!“ Italsce wšitkim dobre wječor přejo witaše moderatorka Gloria Žurec skupinu I Trillanti a publikum sobotu na Koklic dworje. Lědma městna namakachu zajimcy tam, jako předstajichu młodźi Italčenjo modernu wariantu ludoweje hudźby swojeje domizny, kombinujo tradicionalne italske dudy z elektriskimi huslemi a z tamburinami rejwarku při taranteli přewodźejo. Přihladowarjo serbske pěsnje sobu spěwachu, jako tři generacije Smjerdźečanskeje rejwanskeje skupiny jewišćo z temperamentnymi, wufilowanymi choreografijemi pjelnjachu. Skupina Sprjewjan z hosćimi jich hudźbnje přewodźeše. Přiklesk bě wulki. Publikum runje tak zahorił je na to American Rhythm Folk Ensemble z wotměnjawej a perfektnje přednjesenej pokazku ze swingom, gospelom, charlstenom a stepdancom. Dołho čakachu wopytowarjo, zo móhli sej kozacu pječeń zesłodźeć dać. Cordula Ratajczakowa

Runje tak dypkownje kaž je w 19 hodź. na Zahrodnikec/Grutkec dworje běłoruska skupina Krupickaja muzika jako prěnja wječorneho programa swój wustup zahajiła, je tež Daniel Matka alias Madstep ze swojim saksofonom jako wukónc swój program w 1 hodź. dypkownje zahajił. Mjeztym dožiwi publikum Choćebuski ansambl „Stara lubosć“, Ľubomira Tatarku a jeho skupinu ze Słowakskeje, bubnarjow burundiskeho ansambla Batimbo a awstrisku kapału Turbokrowodn. Zajimawe bě wobkedźbować, kak so městno před jewišćom w přestawkach zas a zaso trochu wuprózdnješe. Ručež pak Jakub Wowčer přichodnu skupinu připowědźi, ludźo zaso přichwatachu. Za ćělne­ derjeměće běchu Zahrodnikecy/Grutkecy štyri swinje pražili a po­skićachu nimo toho wšelake družiny pizzy­ a kaž stajnje na festiwalu buchtle z waniljowej jušku. Marian Wjeńka

Na zwučenym městnje stej so zaso Serbski folklorny ansaml Wudwor a spěwna skupina Přezpólni na farskim dworje předstajiłoj. Přiklesk žnějachu Wudworčenjo za inscenaciju Łapanje kokota. Serbam přizamkny so čěska mjeńšina z Chorwatskeje Taneční soubor Holubička. Po starobje měšany cyłk spěwaše a rejwaše pod přewodom hudźbneje skupinki typisku folkloru. Prjedy hač pokaza Serbski ludowy ansambl hišće raz wurězki ze swojeho programa, móžachu so přihladowarjo na prapremjeru wjeselić. Loni wudoby sej hudźbnica Paulina Liznarjec na wubědźowanju serbskich talentow spěchowanske myto za kruch na serbskich husličkach. Šefdirigent SLA Dieter Kempe bě tak zahorjeny a spisa kruch „Za Paulinu“, kotryž orchester zhromadnje ze šulerku zahudźi. Tež Szarkaláb Folk-dance-group madźarskeje mjeńšiny z Rumunskeje wuprudźeše temperament. Bianka Šeferowa

Změna we wjednistwje

Radwor/Worklecy. Angela Rynčowa budźe wot noweho šulskeho lěta 2017/2018 Radworsku zakładnu šulu „Dr. Marja Grólmusec“ nawjedować. Wona přewozmje zastojnstwo wot Brigity Grundmannoweje. We Worklečanskej zakładnej šuli njeje naslědnistwo bywšeje nawodnicy Lucije Kuškec hišće zrjadowane. Kaž kubłanska agentura Budyšin zdźěli, njeje proces hišće cyle dokónčeny.

Nowy wuměłstwowy nawoda

Njebjelčicy. Chrystof Mikławšk je nowy wuměłstwowy nawoda Njebjelčanskeho cyrkwinskeho chóra. To bu wčera na dopołdnišich kemšach w Njebjelčicach wozjewjene. Serbskopazličan, kiž je zdobom organist wosady, přewza zastojnstwo wot Gabriela Vaceka, kiž bě ćěleso 30 lět dirigował. Vacek wostanje chórej dale jako basowy spěwar swěrny.

Wěčne sluby złožiła

Tilich: Folklorny festiwal je sej swoje krute městno w festiwalnym kalendru Europy zdobył

Z tradicionalnej finalnej galu na hłownym jewišću pod Fulkec hórku w Chrósćicach je so wčera XII. mjezynarodny folklorny festiwal „Łužica 2017“ zakónčił. Z cyłkownje 29 ansamblemi z Łužicy a Němskeje kaž tež dwanaće wukrajnymi cyłkami bě so na lětušim festiwalu telko skupin kaž hišće ženje wobdźěliło, rěka ze stron zarjadowarja. Nimo toho zličichu na wšitkich festiwalnych dnjach z wjac hač 20 000 wopytowarjemi znowa wjac ludźi hač před lětomaj.

Chrósćicy (jb/JK/CRM/bn/SN/JaW/CoR). Štyri dny hač do wčerawšeje njedźele bě dwurěčna Łužica pupk swěta. XII. mjezynarodny folklorny festiwal je tysacy ludźi ze wšeho swěta hromadu zwjedł a jim rjane, dožiwjenjowpołne a předewšěm měrliwe dny bjez někajkich rozestajenjow wobradźił.

Hochoza (HA/SN). Festiwal „Łužica“ je tež za Delnju Łužicu rjeńši a pisaniši a zdo­bywa sej tak dale a wjace přihladowarjow, lubowarjow a sympatizantow. To bě měnjenje mnohich z něhdźe 2 500 wobdźělnikow ze wšěch kónčin braniborskeho serbskeho sydlenskeho ruma, kotřiž móžachu minjeny pjatk hižo šesty raz mjezynarodny folklorny swjedźeń dožiwić. Na centralnym jewišću a na třoch burskich statokach su ludowi wuměłcy z dohromady 22 ansamblow z dźesać krajow, z Łužicy a Durinskeje nonstop zawjeselili publikum, w kotrymž běchu tež mmozy młodźi ludźo a swójby z dźěćimi. Tež delnjołužiske skupiny k pisanemu programej přinošowachu, mjez druhim dźěći z Witaj-pěstowarnje w Hochozy, cyłk Słowjańske barwy kaž tež rejwarjo z Choćebuza. Wosebje woblubowani mjez přihladowarjemi běchu wuměłcy z Egyptowskeje, USA a Kolumbiskeje ze swojimi temperamentnymi rejemi a jara pisanymi drastami.

Chrósćicy (SN/BŠe). „W kraju wjesołych dźěći“ bě hesło sobotneho popołdnišeho programa na Chróšćanskim Krawčikec dworje. Najmłódši sobuskutkowacy folklorneho festiwala wjedźechu přihladowarjow do wosebiteho paradiza, tworjo skónčnje pisany kwěćel dźěćaceje zabawy. Program zahajił bě dorost Smjerdźečanskeje rejwanskeje skupiny. Delnjoserbski dźěćacy a młodźinski ansambl přednjese skerje cunje zynki. Tři rejwarki z Delnjeje Łužicy pak překwapichu z modernym breakdancom.

Rom (dpa/SN). Italske knježerstwo chce dalše miliardy eurow přewostajić, zo móhło dwě w krizy tčacej bance předać. Po­trjechenej stej regionalna Banca Popolare di Vicenza a Banca Veneto, kotrejž chcedźa druhej najwjetšej bance Italskeje Intesa Sanpaolo předać. Za to by knježerstwo 5,2 miliardźe eurow přewostajiło. Cyłkownje zaplanuje hač do 17 miliardow eurow, zo móhło rizika zarunać. Europska­ centralna banka bě pjatk zdźěliła, zo njejstej bance hižo přežiwjenja­kmanej, dokelž sedźitej na wulkej hromadźe „zhniłych kreditow“.

Na knježerstwo so dojednali

London (dpa/SN). Britiscy konserwatiwni dojednachu so z dwělomnej sewjeroirskej stronu Democratic Unionist Party na mjeńšinowe knježerstwo. Wotpowědne zrěčenje su dźensa w Londonje podpisali. Při dočasnych wólbach parlamenta spočatk junija bě premierministerka Theresa May ze swojimi konserwatiwnymi knježerstwowu wjetšinu přisadźiła, přiwšěm najsylniša móc w kraju wostała.

Brunicowu jamu blokowali

Aktiwisća wabjachu dźensa w Hamburgu za wulku protestnu akciju, kotruž chcedźa přichodnu njedźelu pod hesłom „Protestna žołma G 20“ w měsće nad Łobjom přewjesć.­ Před Hamburgskej radnicu wustupowachu woni přećiwo socialnej njesprawnosći, za škit klimy a za demokratiju. Foto: dpa/Markus Scholz