Z wudaća: srjeda, 26 julija 2017

Swinjaca mrětwa so dale a bóle rozpřestrěwa. Wot kónca junija je jasne, zo su 25 dźiwich swini w Čěskej na chorosći zahinyli. Nětko tež sakski minister za wobswět Thomas Schmidt (CDU) před rozpřestrěćom warnuje.

Budyšin (SN/BŠe). Hižo we februaru na informaciskim zarjadowanju regionalneho burskeho zwjazka w Lejnje warnowaše předsyda krajinoweho dźěłoweho zjednoćenstwa za hońtwjerske drustwo Gunther Zschommler před so rozpřestrěwacej afrikanskej swinjacej mrětwu. Před měsacami běchu pady na wuchodźe Pólskeje, ale tež w Ukrainje a Ruskej znate. Přiběraca populacija dźiwich swini móže tuž dalše rozpřestrěće zmóžnjeć, Zschommler wuzběhny. Dóńdźe-li k padam we wokolinje, ma to sćěhi za ratarske zawody, kotrež měli swoje škitne naprawy hladajo na chorosće rozšěrić.

W Nowej Wsy pola Wojerec mócnje twarja. Dźěłaćerjo Nadeborec hłuboko­twarskeje firmy z Krušwicy ponowjeja tam druhi wotrězk statneje dróhi S 130 wot gratownje wohnjoweje wobory hač k mostej nad Sprjewicu. Nimo toho kładu tež hnydom dospołnje nowy wotwodźenski system za dešćowu wodu do zemje. Nimo toho přiměrja dróhu po wsy aktualnym wobchadnym wobstejnosćam a dźensnišim jězdźidłam. W septembru ma wšitko hotowe być. Foto: Jost Schmidtchen

Kamjenc (SN/bl). Kónc tohole tydźenja wita Kamjenske towarstwo Iniciatiwa dźěći z Černobyla znowa běłoruskich hosći, kotřiž budu měsac we Łužicy přebywać. Hižo wot lěta 1990, jako towarstwo załožichu, witaja iniciatiwnicy a dalši pomocnicy z wokolnych wsow předewšěm dźěći na wočerstwjenje.

Financnych přičin dla pak přijědźe jich lětsa jenož dwaceći na diabetes schorjenych dźěći do Lessingoweho města. Přebywać budu wone w towarstwowym domje na Fichtowej. Na cokor schorjeni trjebaja kruty dnjowy porjad, wosebitu jědź a medicinske zastaranje. Lětuši wopyt steji pod hesłom „šula – žiwy być z cokorom“. Tak chcedźa Černobylskich hosći nawučić, kak maja z chorosću wobchadźeć, kak měł jich wšědny dźeń wupadać, kotre zežiwidła su lěk, kotre jěd a tójšto wjac.

Zo bychu rybarjo a wudźerjo tež přichodnje w samsnym čołmje sedźeli

Chrjebja (JoS/SN). Jednaćel Chrjebjanskeho rybarstwa tzwr je přeswědčeny, zo budu lětuše žně karpow dobre. „Ryby budu za wšitkich dosahać“, so Dietmar Mühle směje a skedźbnja hižo nětko na tradicionalny rybarski swjedźeń při Čornej truze 21. oktobra.

Minjeny tydźeń zetkachu so w Němčanskej Grofic „La galeriji“ seniorojo wsy. Při šalce bunjaceho a wólnej rozmołwje informowaše jich wjesny předstejićer Wolfgang Neubert wo nowosćach. Tak woni na přikład zhonichu, zo su hakle njedawno zamołwite sakske instancy přepodali městu Wojerecam přizwolenje 2,4 milionow eurow spěchowanja za wutwar dróhi přez Němcy. Naprawa je hižo dawno připowědźena a poprawom chcychu lětsa twarić započeć. Nětko pak dyrbja projekt po cyłej Europje wupisać. Wuměnkarjo so wězo nadźijeja, zo wutwar dróhi klětu budźe­. Dalša zwjeselaca powěsć bě, zo hrajkanišćo pěstowarnje „Pumpot“ wu­twarja a zo su hižo nastroje za 12 000 eurow skazali.

Herbert Schnabel z biosferoweho rezerwata Hornjołužiska hola a haty přednošowaše Němčanskim senioram wo ptakach, jich škiće­ a přebytku w našej wokolinje. Přede­wšěm zajimowachu so rentnarjo za tuchwilny wobstatk baćonow. Za fachowe wuwjedźenja a wotmołwy na prašenja dźakowaše so Monika Neubertowa referentej z małym darom. Achim Nowak

Ze studentami do Pólskeje

Budyšin/Drježdźany. Hišće hač do 31. julija móža so zajimcy za studentske probowe lěhwo Zwjazka serbskich studowacych wot 22. do 24. septembra w pólskim Namysłowje přizjewić. Nimo zhromadnych probow za schadźowanku je tež kulturny program planowany. Swójski přinošk wučinja něhdźe 30 eurow. Přizjewjenja su móžne pola Clemensa Škody pod: .

Předjězbu njewobkedźbował

Kamjenc. Šěsć zranjenych a wjacore tysacy eurow škody je bilanca ćežkeho nje­zboža wčera wječor w Kamjencu na statnej dróze S 94. Z Němskich Pazlic přijěducy 69lětny šofer Subaruwa njebě na křižowanišću w Jěžowje předzjěbu wobkedźbował a do VWja zrazy. Šofer Subaruwa a sobujěducej žonje w VWju so ćežko zranichu, 19lětny šofer VWja a dalšej sobujěducaj lochce. Zo bychu zranjenych tak spěšnje kaž móžno w chorowni zastarać móhli, běchu nimo Kamjenskeje wohnjoweje wobory dwaj helikopteraj, štyri wuchowanske wozy kaž tež nuzowy lěkar zasadźeni. S 94 bě ně­hdźe tři hodźiny zawrjena. Škodu na awtomaj trochuje policija na něhdźe 22 000 eurow. Policija za přičinu njezboža slědźi.