Budyšin. Cyle w znamjenju kónca Prěnjeje swětoweje wójny steji přednošk Luisy Ertel jutře, wutoru, w 19 hodź. w awli Budyskeho Schilleroweho gymnazija. Tam čita wona z listow Maxa Alfreda Neubauera. 1885 w Budyšinje narodźeny wučer ćehnješe 1914 zahorjeny do wójny. Jako wojak bě zwjetša w Francoskej. W mnohich listach je wón swójbnym wo žiwjenju we wójnje a wo swojich dožiwjenjach rozprawjał.
Ekologisce twarić
Stróža. Architektka Kornelia Barth přednošuje zajutřišim, 14. nowembra, w 17 hodź. w Stróžanskim Domje tysac hatow wo móžnosćach ekologiskeho twarjenja z drjewom. Mjez druhim předstaji wona masiwne twarske wašnja z drjewom bjez lěpka a chemije. Zajimcy su wutrobnje přeprošeni.
Motor Kumwałd
– ST 1922 Radwor 2:0 (0:0)
Zestawa hosći: Jendrewski – Šěrak, Henka (74. Rachela), Zähr, Omran, Nuk, Reinecke (87. Hetaš), Bauer, Schulze, Mark (83. Kral), Glücklich
Po słabym wustupje w Bukecach chcychu koparjo Radworskeho ST skónčnje raz tři dypki docpěć. Po 90 mjeńšinach pak bě jich dypkowy staw samsny kaž do hry. Koncentrowany start Radworčanow wjedźeše k tomu, zo wědźeše sej přećiwnik jenož z dołhimi třělwami pomhać. Filip Mark a Stephan Reinecke w nadběhu spytaštaj škitarjow zahe atakować. Woprawdźite šansy pak njemóžeštaj sej nadźěłać. Po 15 mjeńšinach wothrawaše so wulki dźěl jednanja w srjedźnym polu, wšako nochcyše žane mustwo zmylki worać. Tež Kumwałdźenjo njeběchu kreatiwni dosć, a přihladowarjam bě skerje wostudłe. Najlěpšu móžnosć měješe Daniel Nuk krótko do přestawki, jako sam před wrotarjom přetworić njezamó.
Zestawa domjacych: Ebersbach – Bär, Patka, Hoßmang, Kral (80. Langr), Krawčik (58.Treu), Ciapa, Schlicht, Bönisch, Wockatz (69. Mack), T. Schmidt
Awtor dźensa
Michał Nuk
Poprawom sym sej w tutej rubrice předewzał, nic wo kopańcy pisać, dokelž so w njej přemało wuznaju, zo bych prawje sobu rěčeć móhł. To druzy awtorojo wjele lěpje zamóža. Tola hdyž dźe wo Serbsku wubranku, njemóžu prěć, zo sym so znajmjeńša na europskich wulkozarjadowanjach před šěsć lětami we Łužicy abo předlońšim w Južnym Tirolu wot serbskeje euforije rady natyknyć dał. Njedožiwichmy jenož napjate hry, hdźež dźěše za serbskich hrajerjow wo wjace hač jenož sobuhraće. Znajmjeńša runje tak rady dopominam so na wulkotnu naladu a serbski duch mjez přihladowarjemi. Wosebje w Južnym Tirolu 2016 wubudźichu Łužiscy fanojo zjawnu kedźbnosć.
Hertha BSC II
– FSV Budissa Budyšin 3:0 (0:0)
Zestawa hosći: Ebersbach – Patka, Weiß, Hoßmang, Kral, Wockatz (86. Dartsch), Ciapa, Krawčik (62. Bär), Treu (75. Merkel), Schlicht, Bönisch
Z Berlina nochcyše Budissa bjez dypka domoj jěć, tež hdyž bě Hertha BSC II jasny faworit. Prěnjej dobrej móžnosći měješe domjacy cyłk přez Alexandera Essweina (13.) a Floriana Krebsa (14.). Budissa Budyšin pak dyrbješe so nimale jenož z nadběhami Herthy zaběrać. Jeničce třělwa Jonasa Krawčika ze zdalenosće 20 metrow na wrota wrotarja Jonathana Klinsmanna wjedźeše k róžkej za hosći (29.). Po róžku Michaela Schlichta zhłójčkowa Johann Weiß bul strašnje na klětku Klinsmanna, kotryž hrajny nastroj z wuběrnej paradu wotwobara. Na tamnym boku wuznamjeni so Maik Ebersbach po třělwje Essweina (32.). Nětko bě Budissa tróšku lěpje w hrě a Krawčik Jonathana Klinsmanna hišće raz pruwowaše (37.).
Berlin (B/SN). Spominajo na kónc Prěnjeje swětoweje wójny před sto lětami su Ewangelska cyrkej w Němskej, Němska biskopska konferenca, Ewangelska cyrkej Berlin-Braniborska-šleska Hornja Łužica kaž tež arcybiskopstwo wčera na ekumenisku nutrnosć, do Berlinskeje tachantskeje cyrkwje přeprosyli. Boža słužba steješe pod hesłom „Měr w Europje“.
Natwarja zničeny kraj
Mnichow/Karakosh (B/SN). Dźeń a wjace křesćanskich ćěkancow nawróća so do irakskeje Ninive-doliny. Woni su rozsudźeni, sej tam křesćanske herbstwo zachować, rjekny eksperta za čłowjeske prawa katolskeho pomocneho skutka „Cyrkej w nuzy“ Berthold Pelster. Něhdźe 120 000 křesćanow bě před teroristiskej milicu Islamski stat z Ninive-doliny do kurdiskeho dźěla Iraka ćeknyło. Mjeztym je so połojca z nich nawróćiła a pomha nětko při znowanatwarje. Pelster praji, zo su z pomocu cyrkwje wjace hač 40 procentow zničenych a wobškodźenych domow zaso natwarlili. W někotrych kónčinach su tež cyrkwje zaso wotewrěli. Zetkawaja pak so tež w ćežko wobškodźenych cyrkwjach, dokelž nowotwary swój čas traja.