Z wudaća: srjeda, 06 februara 2019

Za datowy škit dyrbja gmejny přichodnje tójšto płaćić

Pančicy-Kukow (SN/MWj). W zarjadniskim zwjazku Při Klóšterskej wodźe dyrbja přichodnje pjenjezy za eksterneho społnomócnjeneho za datowy škit wudawać. Hinak hač planowane pak njemóžachu na wčerawšim posedźenju zarjadniskeho zwjazka wobzamknyć, štó ma tónle nadawk wukonjeć. Dokelž běchu dóšłe poskitki firmow přemało wuprajace a njehodźachu so přirunować, zastupjerjo pjeć sobustawskich gmejnow wotpokazachu, wo tym rozsudźić.

Muža mortweho namakali

Běła Woda. 27lětny Běłowodźan je policiji wčera wječor zdźělił, zo w bydlenju na dróze Wam k zbožu mortwy muž leži. Policija tam 69lětneho namaka, pola kotrehož móžeše nuzowy lěkar jenož hišće smjerć zwěsćić. Hladajo na zranjenja njehodźi so namócny njeskutk wuzamknyć. Dokelž 27lětny rjekny, zo ma něšto z tym činić, jeho nachwilnje zajachu.

Čorny Chołmc (SiR/SN). Nad njewšědnym darom móžeše so minjenu sobotu Čornochołmčanski Krabatowy młyn wjeselić. Jemu je Brigitte Führer dźěl swojich klankow ze serbskimi motiwami dariła. Dokelž bě Wojerowčanka hižo w lěće 2015 swoje 80. narodniny swjećiła, pomhaše jej jeje dźowka Beatrice Schober z mandźelskim Mircom, zo by wšo na prawym městnje było.

Pola serbskich drastowych klankow a postawow z powědkow jedna so wo eksponaty z kónca 70tych a spočatk 80tych lět. Nastali běchu wone we Wo­jerowskim dźěćacym dźěłowym zjednoćenstwje za kostimy a klanki. Hana Bejmina­ z Wjacsławkec Serbskeho drastoweho domu je tehdy při tym pomhała a mjez druhim filigrane sački tykała.

Po lońšej premjerje su minjenu sobotu we Wudworskim Krollec zahrodnistwje druhi raz čaporowe wiki přewjedli. Hinak hač před lětom móžachu wobydlerjo tónraz swójske hižo njetrjebane wěcy wotbyć a Krollecy je w swojej rostlinarni poskićowachu. Dokelž bě dźěl wunoška lońšeje akcije na dobro Smječkečanskeje młodźinskeje wohnjoweje wobory, demonstrowachu jeje čłonojo pokazku swojich kmanosćow. K tomu móžachu sej wopytowarjo pražene kołbaski a horce wino słodźeć dać. Dźěl dobytka sobotnych wikow chcedźa Worklečanskej pěstowarni „K wódnemu mužej“ přewostajić. Foto: Feliks Haza

Wobchod poskića regionalne a biologisce zhotowjene wudźěłki z Łužicy

Bohaty je wuběr biologisce plaho­wanych regionalnych wudźěłkow w Nje­bjelčanskim wjesnym wobchodźe. Z wjele lubosću a kreatiwitu su jednotliwe twory na polcach spřihotowane. „Naš hłowny motiw je, zo ma wobchod zdobom wjesne zetkawanišćo być, hdźež móža ludźo wjele zhonić a dóstawaja najwšelakoriše informacije sposrědkowane“, měnitaj Ruth Tinschert a Thomas Noack. Zhromadnje z Hubertom Langu a Michaelom Schmidtom staj wonaj towaršnikaj Łužiskich dworowych wobchodow. Wot lońšeho nowembra wobhospoda­rjataj­ jedyn tajki w Njebjelčicach, kotryž bě po zawrěću přez mějićelku Margit Puršcynu jenož krótki čas prózdny stał.

FC Energija Choćebuz je so ze škitarjom Robertom Müllerom na zrěčenje dojednało. 32lětny, 1,87 m wulki, nutřkowny škitar přińdźe wot ligoweho konkurenta KFC Uerdingen do Łužicy. Podpisał je wón zrěčenje hač do junija 2020. Rodźeny Schwerinjan a něhdyši narodny hrajer U 21 Němskeje ma tójšto nazhonjenjow w profijowej kopańcy. Dotalne stacije rěkachu Carl Zeiss Jena, Holstein Kiel, Hansa Rostock, SV Wehen Wiesbaden, VfR Aalen a KFC Uerdingen. Tak přińdźe Müller na 297 hrow w třećej lize Němskeje, 55 partijow w druhej lize a 11 zasadźenjow w pokalnym kole Němskeho koparskeho zwjazka. Georg Zielonkowski

W Chrósćicach wuhotowachu stari knje­ža Sportoweje jednotki Chrósćicy w swojej starobnej klasy koparski turněr w Jednoće. Přeprošene běchu mustwa ST Zeleno-běli Hórki, SJ Njebjelčicy, Sokoł Ralbicy/Hórki, ST Marijina hwězda a ST Mały Wosyk. Naposledk mjenowanaj cyłkaj dyrbještaj nažel wotprajić, tak zo so na turněrje jenož štyri cyłki wobdźělichu. Hraješe so kóždy přećiwo kóždemu, a to hnydom dwójce.

Po prěnim kole stejachu Chróšćenjo ze sydom dypkami na čole tabulki a na druhim městnje łakachu Ralbičenjo z jenož jednym dypkom zastatka. Hórčenjo, kotřiž­ hišće tydźeń do toho w Kamjencu dobychu, nakopachu sej štyri dypki a Njebjelčenjo bjez dypka pytachu hišće za formu.

Sportowe towarstwo FC Energija Choćebuz je zdźěliło, zo staj so FCE a kapitan Marc Stein wot hnydom na rozpušćenje zrěčenja dojednałoj. Po dwu a poł lěće wopušći něhdyši profijowy kopar zwjazkoweje ligi FC Energiju, zo by so do Stuttgarta k swojej swójbje wróćił. Stein bě sej na sportowym a tež čłowjeskim polu njewšědnje wulke sympatije zdobył a tež sam wulkotnu zhromadnosć chwalił, ko­truž­ je wón we Łužicy ze stron mustwa a cyłeje wokoliny zeznał. Ze sprawnymi słowami dźaka so 33lětny rozžohnowa a přeješe z cyłeje wutroby zdźerženje klasy­. Georg Zielonkowski

Koparska młodźina hrajneho zjednoćenstwa Kubšicy/Bukecy je kónčne koło haloweho mastersa starobneje klasy młodźina A w sportowni na Budyskim Třělnišću dobyła. Mustwo trenarja Inga Freunda wosta bjez poražki. Nimo toho buštaj z Maksom Korbom a Francom Voigtom hnydom dwaj z dobyćerskeho teama do kruha najlěpšich pjeć koparjow turněra wolenaj. Slěbro wudobychu sej hólcy TSV Wachau a bronzu mustwo Hrajneho zjednoćenstwa Radwor/Wulka Dubrawa.

Foto: Hanspeter Benad