PIWOWY FESTIWAL dožiwjeja České Budějovice. Unikatne zarjadowanje w „stolicy plzenskeho“ traje wot 11. do 16. februara. Na wšěch 250 piwarnjow prezentuje tam znajmjeńša 1 200 pokazkow „chmjelowych juškow“. Na festiwalu, kiž přewjedźe so po dwěmaj lětomaj njewšědneho rozměra dla zaso na wustajenišću, pruwuje nic mjenje hač 450 čěskich kaž tež wukrajnych degustatorow (woptawarjow) poskićene mustry a spožči w 33 kategorijach Złoty piwowy pječat. Wuznamjenjene mustry wubědźuja so potom wo hłowne myto – Swětowy piwowy pječat za najlěpše piwo jednotliwych družin. Zjawnosći je festiwal wot 14. hač do 16. małeho róžka přistupny. Wopytowarjam toča tele dny w 30 kioskach plzenske, swětłe, ćmowe, miksowane, sadowe, prosće cyłu swětowu paletu. Po informacijach direktora festiwala Aloisa Srba wobdźěla so na wubědźowanju wo „złoty pječat“ nimo wšitkich znatych a mjenje znatych piwarnjow kraja tajke z Brazilskeje, Chile, Mexika, Ruskeje, Japanskeje, Belgiskeje, USA, Irskeje, Italskeje, Španiskeje, Nižozemskeje, Pólskeje, Ukrainy, Awstriskeje, Madźarskeje a prěni raz tež z Israela a Chorwatskeje.
Moderna škleńčanonićowa technika zmóžnja přichodnje w Zhorjelskim wokrjesu spěšniši přistup k internetej. K tomu je so tamniši wokrjesny sejmik na swojim januarskim posedźenju znowa wuznał.
Zhorjelc (AK/SN). We wobłuku wosebiteho posedźenja dźensa tydźenja je wjetšina wokrjesnych radźićelow rozdaće wukonow w teritorijach 1–9 w Zhorjelskim wokrjesu wobzamknyła. To potrjechi dohromady 31 komunow wot Mužakowa, Jabłońca, Běłeje Wody a Wuskidźe na sewjeru přez Nisku, Chrjebju-Nowu Wjes w centrumje hač do Žitawy, Olbersdorfa a Oybina na juhu. Nadawk dóstachu – wotpowědnje po kónčinje – předewzaća ENSO, Telekom Němskeje a Netcommunity Zhorjelc. Zakład su směrnicy Zwjazka a swobodneho stata. Wone spěchowanje wutwara zmóžnja. Suma rozdatych nadawkow za mjenowanych 31 komunow wučinja 69 milionow eurow.
Gmejna Dźěwin chce so jako čłon Łužiskeho koła na strukturnej změnje regiona wobdźělić. Tole wjesnjanosta Helmut Krautz (SPD) wčera na posedźenju gmejnskeje rady podšmórny.
Dźěwin (AK/SN). Připrajene lětne 1,5 miliardow eurow maja so po měnjenju Krautza wosebje za nowe dźěłowe městna nałožić. To rěka tam, hdźež ludźo wuhlo wudobywachu, hdźež pak z toho přichodnje hižo mzdy zasłužić njebudu. Dźěwinski wjesnjanosta měni, zo njeměli so pjenjezy prěnjorjadnje za projekty w kónčinach dokoławokoło Drježdźan rozdźělić. „W zakónčacej rozprawje wuhloweje komisije je tež rěč wo spěchowanju kulturnych zarjadowanjow w Zhorjelcu. Njerozumju, što ma to z naprawami k zmištrowanju kulturneje změny činić“, Helmut Krautz wčera na zjawnym gmejnskim wuradźowanju měnješe.
Pytaneho běharja namakali
Kinspork. Srjedu bě so muž pola Kamjenskeje policije přizjewił, prajo, zo pyta swojeho bratra. Tón bě so do Kinsporkskeje hole na běhanje podał a so njenawróćił. Na to jeho zastojnicy z helikopterom pytachu. Z pomocu kamery policisća 30lětneho wuhladachu.
Kanecy (SN/MWj). Jako běchu njedawno mužojo w oranžobarbnych lacach na nowym mosće w Pančicach-Kukowje a pódla njeho při dźěle, sej snano něchtóžkuli mysleše, hač tam z nowotwarom něšto w porjadku njeje. Přičina pak bě cyle hinaša. W nadawku krajneho zarjadnistwa rěčnych zawěrow (LTV) tam sobudźěłaćerjo Njedźichowskeho inženjerskeho běrowa Klóštersku wodu wuměrichu. Nic pak jenož w Pančicach-Kukowje, ale na cyłym wotrězku wot Kanec hač do Kozarc. Jich dźěło je zakład za hydrodynamisko-numerisku simulaciju.
We Łužicy so prawidłownje zymskemu sportej wěnować bě zašłe lěta trochu ćežko, předewšěm pěstuješ-li chětro twjerdu družinu lodohokej. Wěm so na časy dopomnić, – tehdy běch šulski hólčec – to jězdźachmy wšědnje na wjesny hat a so tam smykachmy a lodohokej hrajachmy. Před lětami běchu tež hišće kóždolětne lodohokejowe turněry w Sernjanach, Hrańcy, Koslowje, Róžeńće, Šunowje a na dalšich wsach krute terminy. Mjeztym hižo tajke prawe zymy wjac nimamy.
Wot časa pomjenowanja Leaderoweho regiona Hornjołužiska hola a haty před dźesać lětami buchu hižo mnohe projekty zwoprawdźene. Wobłuki toho su najwšelakoriše a sahaja wot infrastruktury přez turizm hač k hospodarstwu a bydlenjam předewšěm za młode swójby, kotrež chcychu twarsku substancu na wsy zachować a dale wužiwać. Hłowne zaměry su regionalne tworjenje, žiwjenska kwalita, kooperacija a dwurěčnosć, skrućenje zhromadnosće a wuwiće přirody. Serbske Nowiny so spěchowanym wjerškam přichodnje wěnuja a je bliže předstaja.
Rentnar a što potom – wuměnkarsku swobodu wužiwać abo wužadanje přiwzać (21)
Někotři njemóža so tohole časa dočakać, tamni zaso nochcedźa scyła na njón myslić – na zastup do renty. Kajke maja wuměnkarjo wjesela abo starosće, to ze seriju „Rentnar a što potom?“ bliže wobswětlamy.
Hdyž dojědźeš sej wot Konjec do Koćiny napadnje tam prěni statok na prawej stronje. Rjenje hladana dokoławokoło je tež předzahroda, a wulki swjaty křiž zwuraznja, zo je tu křesćanska swójba doma. Staj to Langec mandźelskaj Marja a Franc, kotrajž swjećeštaj loni w oktobru złoty kwas.