Z wudaća: štwórtk, 16 meje 2019
štwórtk, 16 meje 2019 14:00

Wo pućowanju Wenzela Winterberga zhonili

Wojerecy (SiR/SN). Čěski awtor Jaroslav Rudiš je na Wojerowskim hrodźe njedawno swoju nowu knihu „Winterbergs letzte Reise“ předstajił. Nažel je tójšto městnow na žurli swobodnych wostało. Knihu je Rudiš, kotrehož witaše Mirko Schwanitz, w němskej rěči spisał. Premjera to za Čecha, kiž wo sebi praji, zo je to po połojcy, po tamnej pak Němc.

wozjewjene w: Kultura
štwórtk, 16 meje 2019 14:00

Stari knježa za bulom honja

Serbski Sokoł, třěšny zwjazk serbskich sportowčow a sportowcow, budźe pjatk, 14. junija zhromadnje z koparskim mustwom starych knjezow ST 1922 Radwor 23. koparski turněr starych knjezow wo po­kal Serbskeho Sokoła zarjadować. Cyłki zetkaja so w 17.30 hodź., prěnju hru zahwizda sudnik we 18 hodź. Přeprošeni su stari knježa Njebjelčanskeje a Chróšćanskeje SJ, Sokoła Ralbicy/Hórki, ST Radworja, Zeleno-běłych Hórki a ST Marijineje hwězdy. SN

wozjewjene w: Sport
štwórtk, 16 meje 2019 14:00

Trójce za sobu dobyli

SJ Chrósćicy

– ST Fortuna Trjebin 4:2 (3:0)

Zestawa domjacych: Králíček – L. Zahrodnik, Sentivan, Cyž, Püschel (82. Mark), M. Zahrodnik, G. Zahrodnik (67. Młynk), Henčl, Runt, Henzl (82. Bogusz), Beneš

wozjewjene w: Sport
štwórtk, 16 meje 2019 14:00

Běhi po wjacorych distancach

Žitawski hórski běh, mjeztym 46. raz přewjedźeny, słuša sobu k najstaršim wurisanjam cyłeje Němskeje. We wobłuku tutoho wulkeho wubědźowanja tež mnozy atleća we wšěch wotpo­wěd­nych starobnych klasach pućo­warjow (6/8/12/22/32 abo 42 km) swoju wutrajnosć a spěšnosć měrja.

Cyłkownje je wjace hač 5 000 wobdźěl­nikow sportowało. Z nich je so na 1 500 za běhanje rozsudźiło, a mjez nimi tež zaso horstka serbskich.

Na 0,6 km wubědźowachu so 203 předšulske dźěći. Na distancy 4,0 km (324 w cilu) su šulerjo wšěch klasow a starši dorosćeni mocy měrili. Tu star­towaštaj tež Jarek Schade (U 10) a jeho sotra­ Jitka (U 12) z Budyskeje Serbskeje šule. Jarek­ doby w swojej skupinje mjez 48 šulerjemi w 18:34 min a wobsadźi z wurjadnym časom cyłkowne 2. městno mjez wšitkimi 166 staršimi šulerjemi kaž dorosćenymi. Jitka wubědźi sej z časom 23:34 min jara dobre 10. městno w swojej klasy U 12 wot 54 kontrahentkow. Za njej­ doběža hišće 144 staršich šulerkow a žónskich do cila.

wozjewjene w: Sport
Postawa swj. Nepomuka na dworje klóštra Marijineje hwězdy pokaza so bórze zaso w nowej pyše. Rjenčec a Weinrichec molerska­ firma z Dobrošic je ju tele dny dospołnje ponowiła. Prjedy hač budu wobnowjenske dźěła wotzamknjene, pak stara so Hórčan Rafael Hejduška swědomiće wo to, někotre elementy skulptury znowa pozłoćić. Foto: Feliks Haza

wozjewjene w: Lokalka
štwórtk, 16 meje 2019 14:00

Drěmace ideje zwoprawdźić

Za Jasčana Jurja Młynka je samozrozumliwe swoje předewzaće za sanitarne, tepjenske a wopłóčkowe připrawy dale wjesć, byrnjež hižo starši hač 65 lět był. Dobre styki k partneram a wužiwarjam jeho posłužbow dźě zwjazuja. „Chcu to tež hišće chwilu za swojich kupcow činić, dołhož naslědnika nimam. Smy dotal w mjezsobnosći přeco spokojom byli, a to nochcu spušćić“, Młynk wuswětla. Runje tak mysli wón tež wo swojim skutkowanju za Rjemjesło Bóšicy w Bóščanskej gmejnskej radźe. Hižo 16 lět je w njej aktiwny. „W rozmołwje zhonju, što wobydlerjo paruja a što je jim wažne. To wězo­ na posedźenjach gmejnskeje rady praju­. Mam z toho dźěła stajnje wjeselo. Móžu sobu rěčeć, hdyž wo to dźe za gmejnu a jeje wobydlerjow rozsudźeć.“

wozjewjene w: Lokalka
štwórtk, 16 meje 2019 14:00

Za spěchowanje so rozsudźili

Rakecy (JK/SN). Po tym zo bě Rakečanska gmejnska rada na swojim minjenym posedźenju rozsud, přewostajić planowanske dźěła za saněrowanje nadróžneho wobswětlenja zawodej ENSO, hišće raz přestorčiła, je so na wčerawšim nětko tola za mjenowane předewzaće rozsudźiła. Zastupjer ENSO předstaji radźićelam hišće raz nazornje planowanske dźěła, wotběh a zaměr saněrowanja, přestajić system na LED. To a fakt, zo je ENSO hižo wjele lět dobry partner gmejny, pohnu radźićelow, přepodać nadawk we wo­­b­jimje nimale 15 000 eurow energijowemu předewzaću. Cyłkownje pak njesmě projekt po słowach wjesnjanosty Swena Nowotneho (CDU) wjace hač 100 000 eurow­ płaćić. Połojca wudawkow za lampy při hłownych dróhach gmejny spěchuja z programa energetiskeho saně­rowanja.

wozjewjene w: Lokalka
štwórtk, 16 meje 2019 14:00

Železniski přechod so zminył

Němska železnica je w Ćisku přechod přez kolije na B 96 dospołnje zwottorhała. Samo­ pěši tam tuchwilu na druhu stronu njepřińdźeš. Ćisk móžeš z Wojerowskeho směra tež z kolesom jenož hišće přez Schmiedowsku a Hommelowu młynsku šćežku kaž tohorunja přez tunl zastanišća Nowe město docpěć. Paralelnje k twarskim dźěłam při něhdyšim železniskim přechodźe přetwarjeja tež křižowanišćo. Wšitke dźěła su na to wusměrjene, wotewrěć nowu wobjězdku, kotraž wjedźe z Mučowa k nowemu kružnemu wobchadej mjez Wojerecami a Bórkom. Foto: SN/Hanka Šěnec

wozjewjene w: Lokalka
štwórtk, 16 meje 2019 14:00

Słónčna energija pomha hospodarić

Wopłóčkowy zwjazk Při Klóšterskej wodźe­ chce dwě fotowoltaikowej připrawje­ kupić.

Porchow (AK/SN). Zaměrowy wopłóčkowy zwjazk Při Klóšterskej wodźe (AZV) wusměrja so při wobhospodarjenju wodočisćernjow na fotowoltaikowu techniku. Předwčerawšim wuprajichu so čłonojo zwjazkoweje zhromadźizny za modernu techniku. Na wuradźowanju w Porchowje su jednohłósnje wobzamknyli, tajku připrawu za Wudworsku wodočisćernju za něhdźe 42 000 eurow kupić. Dale radźićeljo wobzamknychu, wupisać nakup dalšeje připrawy za čisćernju w Porchowje. Zdobom su předsydu zwjazka Sebastiana Heina społnomóc­nili, nadawk najlěpšemu poskićerjej přepodać.

wozjewjene w: Lokalka
štwórtk, 16 meje 2019 14:00

Křesćan Kulman

13. meje 1869 zemrě wučer, spisowaćel a kantor Křesćan Kulman po dźěłapołnym žiwjenju za serbstwo a serbske pismowstwo. 14. awgusta 1805 bě so wón w Małej Nydeji pola Wojerec narodźił. Zakónčiwši Delnjowujězdźanski wučerski seminar­ wučerješe najprjedy sydom lět w susodnych Lipinach, najwuchodnišej wsy Łazowskeje wosady. Wot jutrow 1831 hač do smjerće běše wučer a kantor w Delnim Wujězdźe. Wuske zwiski wudźeržowaše z fararjom a basnikom Handrijom Zejlerjom, bě awtor serbskich knihow a zeserbšći tójšto spisow a wučbnicow. 1842 wuda ze Zejlerjom „Krótke kěrluše a spěwarske za serbske šule“ a „Zahrodu kwětkojtu“. Jeho najwuznamniši přełožk bě 1862 ćišćane dyrdomdejske powědančko ze swětoweje literatury „Robinson“. Z jeho pjera su dale wučbnica „Serbsko-němski ABC“, „Jan abo spěwaj a dźěłaj“, we Wojerecach pola jeho bratra Jana ćišćane spisy „Tři njewjesty a štwórta ma kwas“, „Wosebite čisło powěsćow“ a „Serbski wustojny pčołar, abo kak dyrbiš w serbskim kraju pčoły plahować“. Wuda tež zběrku swojich basnjow „Bórčate, kałate a palate čmjeły, wosy a šeršenje“. Wot lěta 1847 bě čłon Maćicy Serbskeje. Manfred Laduš

wozjewjene w: Spomnjeće

nawěšk

SERBSKE NOWINY podpěruja:

Novi Sad – kulturna stolica Europy

nowostki LND