Kolesowarka na čarach (Bahnrad) Emma Hinze z Choćebuza bě sej hižo w lětomaj 2014 a 2015 na swětowych a europskich mišterstwach juniorow někotre medalje zawěsćiła. Zo pak je 22lětna nětko tež jako dorosćena na swětowych mišterstwach hnydom trójce na podest smaliła, to samo najwjetšich fachowcow překwapja. Na němskich mišterstwach, přewjedźenych kónc februara w Berlinskim Velodromje, doby w Hildesheimje rodźena sportowča teamowy sprint, sprint a Keirin-wubědźowanje a tak tučelowy trikot, z kotrymž česća najwuspěšnišich.
Kolesowarske swětowe mišterstwa su nimo wurisanjow na olympiskich hrach druhe najwjetše kolesowarske wubědźowanja swěta. Olympia 2020 steji za najwuspěšnišu Choćebusku kolesowarku wšěch časow tež hišće na programje, njebudu-li wotprajene abo přesunjene. Tam budźe sportowča RSC Choćebuza, po dnjach w Berlinje, topfaworitka.
Po tydźenju dowola, kotryž přežiwi wona zhromadnje z přećelom-kolesowarjom Alexanderom Dornbachom na kupje Fuerteventura, je Emma Hinze za olympiske wubědźowanja w Tokiju trenować započała.
Za wutrajnosportowcow to tučasnje runjewon lochke časy njejsu. Hač do kónca apryla su wšitke běhanske wubědźowanja wotprajene a za tymi wot meje hač do kónca lěta steja wulke prašaki. Nichtó mjenujcy w tychle časach njewě, kak so wšitko dale wuwije. Trenować wšak kóždy dale móže, znajmjeńša kolesować a běhać. Płuwać je komplikowane, dokelž su wšitke płuwanske hale zawrjene. Tu někotre wurisanja, za kotrež su přizjewjenja hišće móžne. Wšitke namakaće tež na internetnej stronje www.baer-service.de.
09.05. 29. běh na Sokolnik we Wjazońcy
09.05. AOK-city run & bike w Choćebuzu
10.05. 11. Lipšćanski žonjacy běh
10.05. 19. Bike & run při Sokolniku
we Wjazońcy
16.05. 10. Lipšćanski nócny běh
20.05. 33. běh po Krakečanskich wyšinach
29.05.9. Ramnowski Fichtowy běh
31.05. 13. swjatkowne běhi wokoło
Bjerwałdskeho jězora
06.06. 2. hornjołužiski trail
10.06. 1. Krabatowy firmowy běh
14.06. Swětowe mišterstwa Schiebock
2020 w Biskopicach
24.06. 10. DAK-firmowy běh w Budyšinje
24.06. Běh přećiwo rakej w Drježdźanach
26.06. 17. Žabjacy běh w Běłej
Kilian Hrjehor
W lěće 2014 je so Beata Čórlichec, rodźena Němčanka, pospytała so jónu kwalifikować za swětowe mišterstwa triatlona Ironman na kupje Hawaii. Wubědźowanje wotměwa so stajnje w centralnym Pacifiku srjedź oktobra. Tutón pospyt so jej jako amaterce tehdom derje poradźi z cyłkownym časom 10:30 hodź (3,8 km płuwanje 1:27 hodź; 180 km kolesowanje 5:24 hodź a 42,2 km marathonowy běh 3:45 hodź). Po dalšich třoch trěbnych kwalifikacijach a startach na swětowych mišterstwach w Kona je so wona kóžde lěto dale polěpšiła hač na lońše cyłkowne 10:23:54 hodź. Loni wšak chcyše poprawom wusadźić, ale dokelž bě so jeje prěni start triatlona na kanariskej kupje Lancarote w juliju tak wuběrnje zešlachćił (połnje dosahacy za swětowe mišterstwa Ironman), rozsudźi so wona tola pjaty króć za Hawaii. A tutón spontany rozsud absolutnje njewobžaruje. Wšako je so porno cyłkownemu časej 10:27:37 hodź z lěta 2018 znowa wo nimale štyri mjeńšiny stopnjowała a so pod tamnišimi tropiskimi temperaturami hišće lěpje zaměstniła.