Z wudaća: štwórtk, 18 februara 2021

Berlin (dpa/SN). Diety 709 zapósłancow zwjazkoweho sejma dyrbja po informacijach nowin lětsa 1. julija prěni króć scyła znižić. Přičina toho je loni wosłabjena konjunktura koronakrizy dla a z njej zwjazane woteběrace mzdy, kaž nowina Bild rozprawja. Po dotalnych wobličenjach Zwjazkoweho statistiskeho zarjada je tak mjenowany indeks nominalneje mzdy, na kotrymž so wuwiće dietow zapósłancow orientuje, w lěće 2020 wo 0,6 procentow woteběrał. Z toho wuchadźejo dyrbja zapósłancam tuchwilne diety 10 083,47 eurow brutto wo 60,50 eurow měsačnje znižić. Dotal běchu diety kóžde lěto přiběrali.

Brüssel (dpa/SN). Zakitowanscy ministrojo čłonskich krajow NATO wuradźowachu dźensa wo přichodźe wojerskeho zasadźenja w Afghanistanje. Kaž zwjazkowa zakitowanska ministerka Annegret Kramp-Karrenbauer (CDU) hižo do zahajenja konferency připowědźi, dźěše mjez druhim wo to, kak měli so mjezynarodni wojacy w kraju na přiběrace wohroženje ze stron talibanow nastajić. Tući běchu naposledk z „wulkej wójnu“ hrozyli, njedyrbjeli-li wšitcy wukrajni wojacy hač do 30. apryla Afghanistan wopušćić.

USA běchu talibanam w tak mjenowanym Dohaskim zrěčenju přilubili, zo wojacy hač do kónca apryla juhoaziski kraj wopušća. Za to běchu so talibanojo zawjazali, měrowe jednanja z knježerstwom w Kabulu zahajić a so dalšeje namocy wzdać. Jednanja z knježerstwom wostachu dotal bjez wuspěcha, tež na polu namocy njeje žanoho pozitiwneho wuwića. NATO chce tuž swojich wojakow dale w Afghanistanje wostajić. Němska je tam we wobłuku wukubłanskeje misije z 1 100 wojakami zastupjena.

Debatuja wo planowanych spěšnotestach na koronawirus wot měrca

Berlin (dpa/SN). Komuny a lěkarjo warnuja ludźi hladajo na wot zwjazkoweho knježerstwa připowědźene darmotne spěšnotesty na koronawirus před přewulkimi wočakowanjemi. Nichtó njesměł do toho wěrić, „zo budu wot 1. měrca wšudźe spěšnotesty we wulkej ličbje k dispoziciji“, rjekny hłowny jednaćel Zwjazka městow a gmejnow Němskeje, Gerd Landsberg Berlinskim nowinarjam.

Zahajene šćěpjenja su pokazali, zo je šćěpiwo organizować a rozdźělić „za miliony ludźi runočasnje mamutowy nadawk“, Gerd Landsberg potwjerdźi. Wón žada sej tuž „po schodźenkach postu­pować“. Hdyž njejsu spěšnotesty hišće w dosahacej ličbje k rukomaj, je jich zasadźenje w pěstowarnjach a šulach zmysłapołne. Zasadnje pak Landsberg připowědźenje zwjazkoweho knježerstwa wita, wot měrca wobydlerjam darmotne spěšnotesty poskićeć. „To je wažny signal nadźije nastupajo perspektiwy wotewrjenja šulam a pěstowarnjam kaž tež wobchodnikam, kulturnikam, hotelownikam a hosćencarjam.“

Njedawno je policija wozjewiła, kelko tysacow eurow pokuty je wona mjeztym šoferam napołožiła, kotřiž sedźachu w awće z nahubnikom, jako jich błyskač lepi. Němski nadróžny wobchadny zakonik sej cyle jasnje žada, zo njesmědźa šoferojo ničo činić, štož móhło jich identifikaciju poćežić abo znjemóžnić. Tak njesměš sej mjezwočo ze sněhakowarskej masku zakuklić, abo k póstnicam z masku před mjezwočom za wodźidłom sedźeć. Štož pak je sej sakski nutřkowny minister Wöller (CDU) wumyslił, je runjewon groteskne. Nětko je nahubnik přikazany, Wöller pak šoferam z nahubnikom zakazuje słónčne nawoči wužiwać. Runje w zymskich měsacach, hdyž słónco rano a popołdnju hłuboko steji, bjez nawočow druhdy ničo wjace njewidźiš. Njerěču ani wo ludźoch z problemami wočow. Nimo toho zasahuje sakske knježerstwom ze swojim wukazom do cyłoněmskeho zakonika. Zaso jedna anekdota wjace w njeskónčnej hrě: Štó ma hišće někajku ideju korony dla? Marko Wjeńka

Krakow (ČŽ/K/SN). Składnostnje 30. róčnicy wobstaća zeskupjenja Visegrádska štyrka (V4) wotmě so wčera, srjedu, w Krakowje zetkanje ministerskich prezidentow Čěskeje, Słowakskeje, Pólskeje a Madźarskeje. Premierojo Andrej Babiš, Igor Matovič, Mateusz Morawiecki a Viktor Orban zhódnoćichu tři lětdźesatki spomóžneho zhromadneho dźěła a podpisachu na Wawelu memorandum wo dalšim wusměrjenju V4. Nimo wobjednanja naležnych aktualnych nadawkow kaž stej to na přikład bój přećiwo koronawirusowej pandemiiji a šćěpjenje ludnosće, bě diskusija wo přezmjeznych projektach digitalizacije kaž tež wutwar IT sektora wažnej dypkaj zetkanja. W tym zwisku podpisachu premierojo w přitomnosći předsydy Europskeje rady Charlesa Michela deklaraciju wo zhromadnym dźěle na polu digitalizowanja.

Dźensa před 30 lětami, 18. małeho róžka 1991, je w sakskej statnej kencliji referat za naležnosće Serbow dźěłać započał. Referatny nawoda bě 1998 přezahe zemrěty dr. Simon Brězan. Jemu poboku bě wot měrca samsneho lěta Stanisław Brězan, kiž hač do přitomnosće zastojnstwo społnomócnjeneho za naležnosće Serbow – nětko w sakskim ministerstwje za wědomosć, kulturu a turizm – wukonja. Referat podsteješe spočatnje społno­mócnjenemu za zwjazkowe a europske naležnosće w statnej kencliji dr. Günterej Ermischej. Simon Brězan mjenowaše to w rozmołwje ze Serbskimi Nowinami kónc měrca 1991 „wonkownje dobre znamjo. Namakam wšudźe při wšěch problemach wulku přichilnosć nam Serbam napřećo. Nětko čakamy wšitcy – a za to tež dźěłamy – na skutki ze stron stata.“ Młody referat je na to zaměrnje přihotował zarjadowanje k wu­tworjenju Załožby za serbski lud wosom měsacow pozdźišo we Łazowskej cyrkwi.

Lětuša zyma drje wostanje nam wšěm, wosebje swójbam w pomjatku. Wšako wabješe wona mnohich ludźi do sněha abo na lód. ­Dźewjećlětna Laura a pjećlětna Hannah z Mužakowa běštej sej něšto cyle wosebite wumysliłoj. Zhromadnje ze swojej maćerju ­natwarištej wonej 35 lodowych tortow, kotrež su nimo toho hišće wobarbili. Akcija je wulki zajim wuchodźowarjow wuwabiła. Wšako stejachu torty na studni wosrjedź Mužakowskeho torhošća. Foto: Joachim Rjela

Byrnjež zjawne zarjadnišća hižo dlěje hač měsacaj zawrjene byli, so we Wojerowskej Łužiskej hali tójšto hiba. Silke Richter je so z jednaćelom kulturnišća Dirkom Rolku rozmołwjała.

Maće tuchwilu poskitki, kotrež online předstajeće. Što chceće zajimcam zbližić?

D. Rolka: Tema je, zo mamy so modernišo prezentować. Tuž naše zarjadowanja w socialnych syćach z widejemi streamujemy a tak na sebje skedźbnjamy. Tak chcemy w jutrownym času wusyłać žortne wideja wo zajacach z Łužiskeje hale. Hižo loni smy z nimi na naše jutrowne wiki skedźbnili, kotrež dyrbja tež tónraz korony dla wupadnyć. Tuž běše to dobry krok, wužiwać nowe medije za šěrjenje našich informacijow.

Kajki běše wothłós na poskitk Łužiskeje hale w hodownym času?

Rakečanska gmejnska rada prěni dwójny etat jednohłósnje wobzamknyła

Rakecy (JK/SN). Wo tym, zo ma Rakečanska gmejna solidny hospodarski zakład, je serbski wječornik hižo časćišo rozprawjał. Wčerawše prěnje lětuše posedźenje gmejnskeje rady to hišće raz wuzběhny a potwjerdźi. Jednohłósnje mjenujcy wobzamknychu radźićeljo wustawki za dwójny hospodarski plan gmejny 2021/2022. Prěni raz w stawiznach gmejny Rakecy su tajki plan nastajili. Wjesnjanosta Swen Nowotny (CDU) wobkrući to z dobrym financnym stawom gmejny. Wón wuzběhny tež wjacore lěpšiny tajkeho planowanja, mjez druhim jenož hišće kóžde druhe lěto so z nastajenjom plana zaběrać. Tak ma zarjadnistwo wjace chwile za wšědne a prawidłowne gmejnske nadawki. W dwójnym planje su zakótwjene wjacore wobšěrne inwesticije runje tak kaž spěchowanje a podpěra towarstwow a čestnohamtskeho dźěła, štož je njeparujomny dźěl wuspěšneho komunalneho dźěła.

Kamjenc. Kamjenske dźiwadło je wšitke dotal hišće planowane zarjadowanja w hrajnej dobje wotprajiło. Po móžnosći chcedźa je do noweje 2021/2022 přewzać. Hižo kupjene lisćiki hodźa so z póštu na Kamjensku informaciju wróćić. Pjenjezy kupcam po najspěšnišim puću přepokazaja. Dyrbjało-li móžno być zarjadowanja pod wobmjezowanjemi škitnych naprawow korony dla přewjesć, chcedźa pruwować, hač su wosebite zarjadowanja, abo tajke za šulerjow a towarstwa móžne. Tak ma so po tuchwilnym planowanju na přikład koncert „Sugar Man“ z Thomasom Rühmannom 7. meje přewjesć. Planowanje za přichodnu hrajnu dobu je nimale wotzamknjene. Dokładniše informacije maja bórze slědować.