Z wudaća: wutora, 27 julija 2021

Wopita pomhać chcyła

Lubij. Konsekwency za wšěch wobdźělenych měješe wobchadne njezbožo předwčerawšim w Lubiju. Tam bě wječor krótko po sedmich Fiat 78lětneho muža do latarnje zajěł, dokelž njebě ručne spinadło prawje přićehnjene. Při pospyće, awto zadźeržeć, so muž a jeho 74lětna sobujěduca zraništaj. Na to so jeju dźowka rozsudźi, ze swojim Citroënom k městnu nje­zboža jěć. Tam policisća pola 44lětneje test alkohola přewjedźechu a zwěsćichu, zo měješe wona 3,9 promilow alkohola w kreji. Jeje jězbnu dowolnosć zastojnicy nablaku sćazachu. Wobeju rentnarjow dowjezechu do chorownje.

Hrajerjo ze susodneho kraja hižo mnohe lěta wuspěch sobu zaručeja

W 3. dźělu składnostnje 40lětneho wobstaća Chróšćanskeje SJ wěnujemy so našim čěskim sportowcam. Čěscy koparjo wokoło Pavela Runta, Miroslava Sentivana a Petra Králíčeka wostanu mjenujcy najprjedy dale zepěra prěnjeho mustwa. Ze swojimi nazhonjenjemi podadźa so hrajerjo w awgusće do sezony 2021/2022 w sakskej krajnej klasy. Kak je k zawjazkej z čěskimi hrajerjemi dóšło a kak dyrbi so krok hódnoćić, móže nam najlěpje jednaćel a zamołwity za Chróšćansku kopań­cu Tadej Cyž wujasnić. Jeho syn Feliks je so z nim k tematice rozmołwjał a nam sćěhowace wobšěrne fakty podał:

Interview z jednaćelom SJ Chrósćicy Tadejom Cyžom wo čěskich hrajerjach pola SJC

Kak je k tomu dóšło, zo w Chrósćicach hižo­ wjacore lěta hrajerjo ze susodneje Čěskeje za bulom honja?