Z wudaća: wutora, 12 oktobera 2021

Jubilej šulskeje a domizniskeje stwy hódny podawk

Ptačecy (SiR/SN). Z pisanym swjedźenjom su minjeny kónc tydźenja w Ptačecach (Tätzschwitz) pola Wojerec 20lětne wobstaće tamnišeje šulskeje a domizniskeje stwy woswjećili. Při tej składnosći njepřewjedźechu jeno swjedźenski ćah po wsy, w kotrymž je wjele žonow w serbskej narodnej drasće sobu kročiło. Při měrowym dubje wotkrychu tež nowu serbsko-němsku infotaflu, z kotrejž předewšěm na šulsku a domiznisku stwu a jeje wosebitosće skedźbnjeja.

W bydlenju pjenjezy kradnyła

Běła Woda. Z woporom padušnicy sta so minjeny pjatk rentnarka w Běłej Wodźe, jako wona bluzu kupi. Pola njeje doma bě njeznata žona zaklinkała a jej drastu na předań poskićiła. 86lětna do toho zwoli a dźěše z cuzej do bydlenja. Z witriny wza wona 35 eurow. We wokomiku njekedźbnosće pak sej tamna žona dalše 40 eurow hrabny a so zminy.

Njebjelčicy. Wobzamknjenje wo přiměrjenju staršiskich přinoškow za žłobik, pěstowarnju a hort w Njebjelčanskej gmejnje budźe jedna z temow přichodneho posedźenja Njebjelčanskich gmejnskich radźićelow. Woni schadźuja so zajutřišim, štwórtk, w 19.30 hodź. na gmejnskim zarjedźe. Dale zaběraja so radźićeljo z próstwu wo twar hale z naprawu za kompostowanje a podstajenje techniki w Miłoćicach.

Informuja wo wubědźowanju

Wojerecy/Lejno. Sakski krajny kuratorij za wjesny rum přewjedźe štwórtk serbskorěčne zarjadowanje, hdźež informuja wo sakskim wubědźowanju simul+. Wone podpěruje projekty, kotrež towaršnostnu zhromadnosć skruća, žiwjenske wuměnjenja polěpšeja a tak k strukturnemu wuwiću w Sakskej přinošuja. Informaciski wječor wotměje so w 17 hodź. w Lejnjanskim hosćencu „K Lipje“. Při­zjewić so trjeba njeje. Škitne postajenja korony dla pak maja zajimcy wobkedźbować.

Njeswačidło (LR/SN). Z połdralětnym zapozdźenjom korony dla wotmě Njeswačanske towarstwo Přećeljo domizny a kultury minjenu sobotu swoju lětnu zhromadźiznu z wólbami noweho předsydstwa. Towarstwu přisłuša 95 čłonow. Nimo hrodowych koncertow a galerijow na hrodźe wěnuja so tež nadawkam kołowokoło hrodu a parka. Tak staraja so čestnohamtsce wo to, zo móžeš sej hród tež njedźelu wobhladać. Hišće hač do kónca winowca su mólby seniorow Budyšina a cyłeho Budyskeho wokrjesa we wosebitej wustajeńcy widźeć.

Dopomnjenki na spočatki honjeńcy za bulom hač do towaršnostneho přewróta (2. dźěl)

b.) 1950 do 1960

Dokelž hodźeše so spočatk 1950tych lět dale jenož (prowizoriske) kopanišćo při młodowni wužiwać, nasrěbachu sej mužojo a młodźina wosebje w přećelskich hrach z SJ Hórki dalše sebjewědomje. Młodźina přěhra 1954 na přikład z 0:5, ale lěto pozdźišo Hórčenjo jeno z 1:0 snadnje dobychu. Najlěpši wuslědk muži bě njerozsudne 4:4.

W lětach 1951 do 1959 bě Bruno Richter předsyda Pančičanskich koparjow. W tej dobje nasta na městnje dźensni­šeho twjerdeho nowe hrajnišćo. Ze za­palom poda so muske mustwo w sezonje 1954/1955 do dypkowych hrow. Naj­lěpše zaměstnjenje poradźi so w 2. wo­krjesnej klasy 1956 z třećim městnom. Na­čolnik SJ Hórki postupi w samsnym lěće do 1. wokrjesneje klasy. Samsne lěto pak so traktoristam sensacija zešlachći: na Serbskim sportowym zjězdźe w Ra­dworju dobychu pokalne fina­le z 1:0 přeći­wo Hórčanam, jako Jan Hicka hižo w prěnich mjeńšinach „złote“ wrota třě­li.­ W młodźinskej stafli mjenowaneje sezo­ny Hórčanski dorost z 45:6 wrotami a 18:2 dypkami jasnje dominowaše, mjez­tym zo zabrachu „klóšterscy“ 6. městno (17:28 resp. 9:11).

Tennis Borussia Berlin –

Energija Choćebuz 2:2 (2:1)

Zestawa hosći: Stahl – Hofmann (76. Harz), Kauter (87. Geisler), Koch, Borgmann, Erlbeck (46. Eisenhuth), Hildebrandt, Hasse (46. Schulz), Proničew, Zografakis (46. Badu), Engelhardt.

Z módrym wóčkom a dypkom su so koparjo FC Energije Choćebuz minjenu srjedu z Berlina nawróćili. Woni drje móžachu so hižo po pjeć hratych mjeńšinach přez wrota Maximiliana Proničewa po zmylku wrotarja wjeselić, štož pak njerěkaše, zo bě FCE hižo dobył. Zhubjene bule a přěhrate dwuboje Berlinjanow sylnjachu, štož bu přez dwoje wrota Turki Tahsina Çakmaka krónowane. Wobaj razaj wón krótko před šěsnatku na wrota třěli a bě wuspěšny.

Kopańca, wokrjesna pokal

Hórnikeč. jězor – Něm. Pazlicy II  0:5 (0:3)

HZ Horni kraj-Sprjewja II – Ramnow II/Bretnig-Hauswalde II2:5 (1:2)

Wachau II – Bukecy6:3 (3:1)

Arnsdorf II – Łaz/Běły Chołmc II  3:2 (1:0)

Wulka Dubrawa – Ralbicy/Hórki 1:2 (1:1)

Łaz/Běły Chołmc II – Sepicy 0:1 (0:0)

Malešecy – Radworwupad

Ottend.-Okrilla – Wojerowski FC  0:6 (0:2)

HZ Hory II/Bluń – HZ Wóslink/Skaskow/Kulow II2:6 (0:3)

Wjazońca – Póst Budyšin  1:3 (0:1)

Chrósćicy II – Wachau 1:3 (1:1)

Wjelećin II – Großnaundorf  1:3 (0:2)

Němske Pazlicy II – Kubšicy  3:0 (2:0)

Haselbachtal – HZ Horni kraj-Sprjewja II 2:1 (1:1)

Nadrózna Hrabowka – HZ Kumwałd/Šumbach1:2 (0:2)

Hlinowc – HZ Germania Biskopicy/Biskopičanske KT III2:3 (1:2)

HZ Hórnikečanski Jězor –

SJ Njebjelčicy 4:2 (2:1)

Zestawa hosći: Hahn – Haška, Reineke, D. Kral, Šołta, Čornak, Hoelzel (35. S. Kral), Bergmann (67. Schaaf), F. Domš, O. Domš, Korjeńk