Berlin (dpa/SN). Šefojo amploweje koalicije SPD, Zelenych a FDP su tež dźensa rano w kanclerskim zarjedźe dale diskutowali. Tuchwilne konflikty amploweje koalicije njejsu hišće rozrisane. Předewšěm dźe wo temy kaž spěšniši wutwar zwjazkowych awtodróhow, wotstronjenje wolijowych a płunowych tepjenjow kaž tež financowanje zakładneho zawěsćenja za dźěći.
Kaž fachowc FDP za etat Otto Fricke při tym wuzběhny, pokazaja trajace rozmołwy na to, zo so stronje prócujetej rozrisanje nańć. Dokelž diskusije dale trajachu, je FDP poesedźenje prezidija a nowinsku konferencu wotprajiła.
„Je wjele nadawkow, kotrež dyrbimy zmištrować, předewšěm hladajo na krizu klimy“, podšmórny prěnja parlamentariska jednaćelka Zelenych Irene Mihalic. Wona plany hospodarskeho ministra Roberta Habecka (Zeleni) zakitowaše. Wot klětušeho maja nowozatwarjene tepjenja znajmjeńša 65 procentow na zakładźe wobnowjomnych energijow „nadźěłać“, štož wjedźeše k rozkorje, dokelž njemóže wjele ludźi tole financielnje zmištrować.
Budyšin (SN/BŠe). Na stronskim zjězdźe w Budyšinje hotowachu so sakscy Zeleni na klětuši wólbny bój. Přichodnje chce sej strona wo wjele lěpši wólbny wuslědk wuwojować. W lěće 2019 docpě wona 8,6 procentow hłosow. Sakska justicna ministerka Katja Meier a wobswětowy a energijowy minister Wolfram Günther přizjewištaj wobaj, zo chcetaj jako načolnaj kandidataj k wólbam nastupić. Günther pak rěčeše wo tym, zo móhłoj tež jako team wustupować.
Serbsko słowo na stronskim zjězdźe, dosć impulsow z bazy za praktisku politiku na regionalnej a mjezynarodnej runinje – sakscy Zeleni su so w Budyšinje jako čile diskutowaca a zaměrna organizacija prezentowali. So wě, zo njeje strona tuchwilu w ludnosći Łužicy runjewon woblubowana. Ale jeje zwjazkowa předsydka je na přeswědčace wašnje wobkrućiła, zo matej wobchowanje stwórby a zachowanje socialneho měra dwě stronje samsneje medalje być. Čim wjac ludźi to za wěryhódne ma, ćim mjenje problemow z akceptancu we Łužicy strona změje.
Wušiknje skutkuje na jednym boku jako seriozna koaliciska partnerka, zdobom pak někak kaž opozicija napřećo CDU. Jeli Lěwica – hlej hrožace pačenje dokoławokoło Wagenknecht – dale rozpaduje, maja Zeleni do klětušich wólbow krajneho sejma poleposition. Jich frakciska předsydka z Łužicy Franziska Schubert je politiski prototyp jednoty konserwatiwnych a doprědkarskich myslow. Marcel Brauman
Berlin (dpa/SN). Wuměnjeja-li so studowacy za čas online-pruwowanja intensiwnje w chatowych skupinach, móža jich jebanstwa dla eksmatrikulować. To je Berlinske zarjadniske sudnistwo minjeny pjatk rozsudźiło. Tak njeńdźe wo to, hač bě wuměna spomóžna a so tam prawe wotmołwy diskutowachu, w zdźělence sudnistwa rěka. Z tym njebě skóržba studentki studijneho směra „Zjawne zarjadnistwo“ wuspěšna. Ju běchu „wosebje ćežkeho jebanstwa“ dla eksmatrikulowali.
Po słowach sudnikow je studentka w juliju 2021 online-klawsuru pisała. Po korekturje přihrawachu so docentej a pruwowarjej screenshoty ze chatoweje skupiny, w kotrejž so mnozy wobdźělnicy pruwowanja – mjez nimi tež skóržbnica – wuměnjachu. Wysoka šula zahaji přećiwo wobdźělnikam skupiny pruwowanske jednanje podhlada zamylenja dla. Skónčnje potrjechenych eksmatrikulowachu. Kaž sudnicy minjeny pjatk wopodstatnichu, bě to prawje. Po tym zo dóńdźe při online-pruwowanjach k wulkej ličbje wobšudźenjow, je wysoka šula nětko sankcije wuwjedła, kotrež maja wulku wottrašacu skutkownosć.
Wobydlerske etaty su dobra móžnosć, hdyž chcedźa ludźo aktiwnje při porjeńšenju města přinošować. Na te wašnje su na přikład we Wojerecach hižo wjele docpěli. Tež w Budyšinje tajki etat mjeztym wjacore lěta maja. Nětko su ludźo znowa namołwjeni, namjety zapodać.
Budyšin (SN/MWj). Ze spočatkom nalěća Budyske měšćanske zarjadnistwo wobydlerjow namołwja, k porjeńšenju města přinošować. Za to wobsteji wot lěta 2017 z wobydlerskim etatom hornc pjenjez, kiž hodźi so za najwšelakoriše małe projekty a předewzaća wužiwać. „Chcemy angažement wobydlerjow spěchować a wšitkich namołwjamy, so za porjeńšenje města a zhromadnosć wobydlerjow zasadźować“, praji wyši měšćanosta Karsten Vogt (CDU) w nowinskim wozjewjenju. Při tym maja pjenjezy po móžnosći na dobro wjele ludźi w jich konkretnym žiwjenskim wobswěće być. Tež lětsa město zaso 10 000 eurow za tajke projekty přewostaja. Hač do 4. apryla móža wobydlerjo projekty namjetować a wotpowědne próstwy zapodać. Wot junija financny wuběrk rozsudźi, kotre projekty maja so w tymle lěće zwoprawdźić.
Palne drjewo pokradnyli
Wojerecy. Zo je palne drjewo mjeztym jara požadane, dyrbješe wobsedźer zahrodki na Rólnym puću we Wojerecach minjeny kónc tydźenja zwěsćić. W zymskich měsacach wón wjacore tydźenje w swojej zahrodce njebě. W tym času tam njeznaći po wšěm zdaću wjacore razy pobychu a dohromady něhdźe tři kubikne metry drjewa pokradnychu. Škodu trochuje policija na něhdźe 300 eurow.
Papjery wotedać dyrbjał
Hamor. 57lětneho wodźerja Škody su policisća sobotu wječor pola Hamora na puću do Krynhelec kontrolowali. Pola njeho přewjedźechu alkoholowy test a zwěsćichu, zo měješe muž 1,16 promilow alkohola w kreji. Swoje awto dyrbješe na to stejo wostajić a policistam jězbnu dowolnosć wotedać.
Slepo (JoS/SN). 24. serbske wiki jutrownych jejkow w Slepjanskim Serbskim kulturnym centrumje (SKC) su kónc tydźenja nowe měritka za přichod nastajili. Z wjace hač 4 300 wopytowarjemi docpěchu rekordnu ličbu. Na woběmaj dnjomaj so na žurli, w dźěłarni, galeriji a wonka z ludźimi mjerwješe. Wjace hač 30 debjerjow swoje filigrane wuměłstwo předstaji. Nimo toho něhdźe 50 wikowarjow najwšelakoriše wudźěłki poskićowaše. Předewšěm debjerjo zwěsćichu, zo wopytowarjo wjace debjenych jejkow hač w minjenych lětach kupowachu.
Šunow. Přichodny škotowy turněr serbskich seniorow wotměje so wutoru, 28. měrca, w Šunowskej Fabrikskej hospodźe. Započatk budźe w 14 hodź. Tež tónraz su nowačkojo wutrobnje witani. K dalšemu turněrej zetkaja so wuměnkarjo 25. apryla w Radworskim hosćencu Meja.
Radźićeljo wuradźuja
Chrósćicy. Dróhotwarske dźěła na Cyrkwinskej horje a Při Satkuli w Chrósćicach budu jedna z temow přichodneho posedźenja Chróšćanskeje gmejnskeje rady jutře, wutoru, w 19 hodź. w gmejnskim a kulturnym centrumje Łužica. Dale wobzamknu radźićeljo nadawk za dodawanje a montažu noweje busoweje čakarnje w Chrósćicach. Loni w oktobru je bus tak njezbožownje zawinył, zo do čakarnje zrazy a ju dospołnje skóncowa.
Dary za nowe ławki w Lipju
Pančicy-Kukow. Swoju premjeru změje jutrońčku nowa akustiska technika, kotruž je Přećelski kruh klóštra Marijina hwězda za klóšterski dwór kupił. Na hłownej zhromadźiznje su po rozprawje Katolskeho Posoła darjensku akciju za wobnowjenje ławkow w Lipju zahajili, konto: Freundeskreis Abtei St. Marienstern, IBAN: DE 66 8505 0300 3000 0600 21, hesło: Bänke Lippe-Park